KİV: Baydenin komandası gənc seçiciləri cəlb etmək üçün “TikTok”a üz tutur
Bakı, 17 noyabr, AZƏRTAC
ABŞ Prezidenti Cozef Baydenin seçki qərargahı gənc seçiciləri cəlb etmək üçün “TikTok” tətbiqində qeydiyyatdan keçmək imkanını müzakirə edir.
AZƏRTAC Axio portalına istinadla xəbər verir ki, Cozef Baydenin komandası hələlik platformadan istifadə etmir və “TikTok” tətbiqində qeydiyyatdan keçmiş məşhur şəxslər və Demokratik partiyanın nümayəndələri vasitəsilə seçicilərə təsir göstərməyə çalışır. Partiyanın bəzi nümayəndələri bu yaxınlarda gənclər arasında tərəfdar toplamaq üçün “TikTok” səhifələri açıb.
Respublikaçılar isə Çin hakimiyyətinin tətbiq vasitəsilə şəxsi məlumatları ələ keçirəcəyindən ehtiyatlandıqları üçün “TikTok”dan istifadə etmirlər.
ABŞ-ın hakimiyyət orqanları “TikTok” tətbiqindən istifadə ilə bağlı narahatlıqlarını dəfələrlə ifadə edib. ABŞ kəşfiyyat orqanlarının məlumatına görə, Çin sosial şəbəkəsi milli təhlükəsizliyə təhdid yaradır. Onların fikrincə, mənzil-qərargahı Çində yerləşən “ByteDance” kompaniyasına məxsus “TikTok” tətbiqi Pekin tərəfindən amerikalı istifadəçilərin məlumatlarını toplamaq üçün istifadə edilə bilər. Birləşmiş Ştatlarda “TikTok” istifadəçilərinin sayı 100 milyon nəfərdən çoxdur.
Qısa videoları yükləməyə imkan verən “TikTok” sosial şəbəkəsi 2017-ci ildə, beynəlxalq versiyası isə 2018-ci ilin avqustunda istifadəyə verilib. Şəbəkənin sahibi Çinin ByteDance texnologiya şirkətidir. Platformanın aktiv istifadəçilərinin sayı 1 milyardı ötüb, onun tətbiqi 3 milyard dəfədən çox yüklənib.
Bölmənin digər xəbərləri
