KİYEVDƏ QARA DƏNİZ ÖLKƏLƏRİ MİLLİ İNFORMASİYA AGENTLİKLƏRİNİN ASSOSİASİYASI YARADILMIŞDIR
Mayın 29-da iştirakçılar Kiyev şəhər dövlət administrasiyasında qəbul olunmuşlar. Kiyev şəhərinin başçısı Leonid Çernovetskinin adından onları merin müavini Vitali Juravski səmimiyyətlə salamladı. Ukrayna Dövlət Televiziya və Radio Verilişləri Komitəsinin sədri İvan Çij beynəlxalq forumun iştirakçılarına uğurlar arzuladı. Merin adından konfrans iştirakçılarına xatirə hədiyyəsi təqdim edildi.
Mayın 30-da “Kiyev” Prezident hotelində təsis konfransının ümumi iclası açıldı. Əvvəlcə Ukrayna Prezidenti Viktor Yuşşenkonun, Baş nazir Yuri Yexanurovun, xarici işlər naziri Boris Tarasyukun və Kiyevin meri Leonid Çernovetskinin iştirakçılara təbrikləri oxundu.
Konfransda Qara Dəniz İqtisadi Əməkdaşlıq Təşkilatı (QİƏT) daimi beynəlxalq katibliyinin icraçı direktoru Andrey Kononenko, Ukrinformun baş direktoru Viktor Çamara, Anadolu Agentliyinin baş direktoru Hilmi Bengi, İTAR-TASS agentliyi baş direktorunun birinci müavini Mixail Qusman, AZƏRTAC-ın baş direktoru Aslan Aslanov və başqaları çıxış etdilər. Aslan Aslanov forumun yüksək səviyyədə təşkilinə və qonaqpərvərliyə görə Ukrayna tərəfinə təşəkkür edərək vurğuladı ki, Azərbaycan Qara dəniz hövzəsi ölkələrinin informasiya məkanını daha da genişləndirmək ideyasını, milli informasiya agentlikləri arasında bərabərhüquqlu və sərbəst mübadilənin, informasiya sahəsində əməkdaşlığın inkişafı üçün qarşılıqlı əlaqələrin yaradılmasını fəal surətdə dəstəkləyir.
Müzakirədən sonra konfrans iştirakçıları “Qara Dəniz Ölkələri İnformasiya Agentlikləri Assosiasiyasının (PANİA) yaradılması haqqında” Bəyannamə qəbul etdilər, qurumun Nizamnaməsini təsdiqlədilər. Xatırladaq ki, Azərbaycan tərəfinin bütün düzəlişləri nəzərə alındı və sənədlərdə öz əksini tapdı.
Beləliklə, Avropanın informasiya xəritəsində yeni regional qurum meydana gəldi.
Assosiasiyanın üzvü olan bütün agentliklər QİƏT ölkələrini təmsil edirlər.
Ukrinformun baş direktoru Viktor Çamara Assosiasiyanın sədri, Bolqarıstan Teleqraf Agentliyinin baş direktoru Maksim Minçev onun müavini seçildilər.
Assosiasiyanın növbəti iclası 2007-ci ildə Bolqarıstanda keçiriləcəkdir.
Forumun iştirakçıları iclasdan sonra jurnalistlərin suallarına cavab verdilər.
Təsis konfransı mayın 31-də başa çatacaqdır.
Bölmənin digər xəbərləri
