KONRAD ADENAUER FONDUNUN BAŞ KATİBİ VİLHELM ŞTAUDAXERİN ÇIXIŞI
-Zati-aliləri, hörmətli cənab Prezident və xanım Əliyeva!
Mən sizin hamınızı salamlayıram. Çox şadam ki, burada Almaniya Bundestaqının bir çox nümayəndəsi də iştirak edir. Bir daha hamınıza “Xoş gəlmisiniz!” deyirəm. Mən həmçinin hiss edirəm ki, cənab Şopenhoff ilə birgə hamınız hörmətli qonağımızla görüşə böyük maraqla gəlmisiniz. Cənab Şopenhoff müzakirələrə sədrlik edəcəkdir. Lakin böyük məmnuniyyətlə qeyd edirəm ki, bu gün iştirakçıların belə çoxsaylı olması qonağımızın çıxışına olan xüsusi diqqət və maraqdan xəbər verir.
Cənab Prezident, bu axşam burada bu qədər iştirakçıların olması ölkənizin inkişafı ilə bağlı söyləyəcəyiniz maraqlı fikirləri eşitməkdən irəli gəlir və iştirakçılar bunu səbirsizliklə gözləyirlər.
Almaniya ilə Azərbaycan arasında əlaqələrin uzun tarixi var və yaxşı ənənələrə əsaslanır. Hələ 1819-cu ildə ilk alman köçkünləri Azərbaycana gəlmişlər. Onlardan biri hətta Bakıda quberniya mühəndisi işləmişdir. Mən onun adını da çəkmək istəyirəm. Onun adı çox mənalı və gözəl səslənir: Mikolaus fon der Nonne. Yaxud, Siemens qardaşları vaxtilə Gədəbəydə mis istehsalı ilə məşğul olmuşlar. Yəni, ümumi tariximiz ölkənizin Almaniya ilə münasibətlərinin nə qədər qədim olduğunu nümayiş etdirir. Həmin vaxtdan etibarən əlaqələrimiz nəinki kəsilməmiş, hətta inkişaf etmiş və son illər ərzində daha da sıx və intensiv xarakter almışdır.
Cənab Prezident, Siz son iki-üç ildə Almaniyada, Berlində iki dəfə olmusunuz və indi, 2007-ci ildə yenidən paytaxtımıza gəlmisiniz. Bu, həmçinin onunla bağlıdır ki, Almaniya hazırda Avropa İttifaqına sədrlik edir. Avropa İttifaqının Şərqə doğru genişlənməsi, Rumıniya və Bolqarıstanın daxil olması nəticəsində Avropa ilə Azərbaycan bir-biri ilə müəyyən mənada qonşu olmuşdur. Bu səbəbdən deyə bilərəm ki, qonşu ölkəyə xoş gəlmisiniz!
Artıq dediyim kimi, Siz 2004-cü və 2006-cı illərdə Almaniyada səfərdə olmusunuz və özünüzü Berlində evinizdəki kimi hiss edə bilərsiniz. Eyni zamanda, demək istəyirəm ki, Berlində bir neçə yüz azərbaycanlı yaşayır. “Berlin Festivalı-2007”də Azərbaycan rejissoru Oleq Səfərəliyevin filmi nümayiş etdiriləcəkdir. Təəssüf ki, azərbaycanca adını deyə bilməyəcəyəm, ingiliscə isə, həmin film “Good bay Satten City” adlanır. Çox ümid edirik ki, bu film mükafat alacaqdır. Berlində azərbaycanlı rəssam, dizayn və qrafika ustası İbrahim Əhrari və virtuoz pianoçu Emin Məmmədov da yaşayırlar. Bu o deməkdir ki, biz Berlində Azərbaycan mədəniyyəti vasitəsilə zənginləşirik. Mən bir daha Sizi və bu görüşə gəlmiş Azərbaycan rəsmilərini salamlayır, Sizə “Xoş gəlmisiniz!” deyirəm.
Azərbaycan “odlar yurdu” deməkdir. Hələ orta əsrlərdə Azərbaycanın zəngin neft ölkəsi olması məlum idi. Ancaq əslində, zəngin sərvətlərin olmasının həm mənfi, həm də müsbət cəhətləri olur. Müsbət cəhəti ondan ibarətdir ki, Dünya Bankının hesablamalarına görə, Azərbaycanın inkişafı 2005-ci ildə 26,5 faiz olmuşdur. Həmin neft sərvəti müəyyən problemlər də yaradır. Azərbaycan coğrafi-strateji, daha dəqiq desək, coğrafi-strateji- iqtisadi əhəmiyyətə malik olan ölkəyə çevrilməkdədir. Bununla yanaşı, Azərbaycan bir tərəfdən, ABŞ-la Rusiyanın, digər tərəfdən isə, İranla Türkiyənin maraqlarının kəsişdiyi məkanda yerləşir. Bu o deməkdir ki, Azərbaycan üçün önəmli olan meyar, eyni zamanda, risk də yarada bilər.
Biz böyük bir maraqla Sizdən eşitmək istəyirik ki, Azərbaycan bu cür mürəkkəb xarici siyasət mühitində öz mövqeyini hansı yolla saxlayır və heç kimin marağına toxunmur. Eyni zamanda, cənab Prezident, bilmək istəyirik ki, Siz Avropa İttifaqından hansı dəstəyi gözləyirsiniz? Azərbaycan qısa bir müddət ərzində gözəçarpan dərəcədə inkişaf etmişdir. Təkcə 2004-2005-ci illərdə adambaşına düşən gəlirin həcmi ildə 500 dollar artmışdır.
Eyni zamanda, Almaniya ilə aparılan idxal və ixrac əməliyyatları iki dəfə artmışdır. 2008-ci ilə qədər artım daha da çox olacaqdır. Beləliklə, enerji sektoru ilə bərabər, digər sahələr də inkişaf edəcəkdir. Bütün bunlar ümid verir ki, Azərbaycan iqtisadiyyatı olduqca geniş bünövrəyə əsaslanacaqdır. Biz Qərbi avropalılar bilirik ki, belə bir sürətli iqtisadi inkişafla digər sosial problemləri də həll etmək mümkündür.
Cənab Prezident, ölkənizdəki daxili siyasi, ictimai və sosial planlarınız barədə məlumat verməyinizdən çox məmnun olardıq. Konrad Adenauer Fondunun qonağı kimi bir daha Sizə “Xoş gəlmisiniz!” deyirik. Ölkənizə bizim marağımız olduqca böyükdür və gələcəkdə Azərbaycanda fəaliyyətimizin genişləndirilməsinə, xüsusən də gənclərin təhsilinə, ölkənizin iqtisadiyyatına və siyasətinə rəhbərlik edəcək gənc nəslin formalaşdırılması işinə önəm verəcəyik. Bilirik ki, Azərbaycanda müxtəlif dinlərə mənsub olan adamlar yaşayırlar. Bu cür yerlərdə dinlərarası dialoqlara ehtiyac böyük olur. İstərdik ki, Azərbaycan beynəlxalq səviyyədə dinlərarası dialoqlara cəlb olunsun. Eyni zamanda, Azərbaycanın uzun müddət apardığımız Qara dəniz dialoquna da qoşulmasını arzulayırıq. Azərbaycan Avropaya aid olan qlobal təhlükəsizlik siyasətində iştirak etməlidir və bununla yanaşı, Avropa İttifaqı ilə əlaqələrin inkişafına öz töhfəsini verməlidir.
Mən bütün bunları nəzərə alaraq, görüşə gəlmiş və burada iştirak edən hər kəsə bir daha minnətdarlığımı ifadə edir, cənab Prezidentin çıxışını məmnuniyyətlə dinləməyə hazır olduğumuzu bir daha qeyd edirəm.
X X X
Prezident İlham Əliyev görüşdə nitq söylədi.
Bölmənin digər xəbərləri
