Konstansa limanı Türkmənistan təbii qazının Avropaya giriş qapısına çevrilə bilər
Buxarest, 30 iyul, AZƏRTAC
Rumıniyanın Konstansa limanı Türkmənistan təbii qazının Avropa bazarına çıxışı üçün əsas giriş məntəqələrindən birinə çevrilə bilər.
AZƏRTAC xəbər verir ki, bunu Rumıniya Ticarət və Sənaye Palatasının (CCIR) prezidenti Mihay Daraban Türkmənistanın Rumıniyadakı səfiri Annamammet Annayev ilə görüşdə deyib. O bildirib ki, Türkmənistan qazı əvvəlcə Azərbaycan və Gürcüstanın nəqliyyat infrastrukturu vasitəsilə Qara dəniz regionuna çatdırıla, daha sonra isə BRUA qaz kəməri ilə Avropa ölkələrinə nəql oluna bilər.
Mihay Daraban qeyd edib ki, belə bir layihənin reallaşması Rumıniya ilə Türkmənistan arasında iqtisadi əməkdaşlığın genişlənməsinə ciddi təkan verəcək. Onun sözlərinə görə, enerji sektoru hazırkı Avropa şəraitində iki ölkənin biznes dairələrini bir araya gətirə biləcək ən perspektivli istiqamətlərdən biridir.
Görüş zamanı tərəflər enerji sahəsi ilə yanaşı, Konstansa və Türkmənbaşı limanları arasında birbaşa əməkdaşlığın inkişafı, logistika əlaqələrinin genişləndirilməsi və yeni investisiya imkanlarını da müzakirə ediblər. CCIR rəhbəri Xəzər regionundan Avropaya təbii qaz nəqlini nəzərdə tutan AGRI layihəsinin yenidən gündəmə gətirilməsini də təklif edib. Layihə həyata keçiriləcəyi təqdirdə, Türkmənistanın zəngin qaz ehtiyatlarının Avropa bazarına çıxışı üçün yeni marşrut formalaşa bilər.
Türkmənistanın Rumıniyadakı səfiri Annamammet Annayev isə ölkəsinin 2026-cı ilin ilk yarısında ümumi daxili məhsulunun 6,3 faiz artdığını, Türkmənistanın təsdiqlənmiş təbii qaz ehtiyatlarına görə dünyada dördüncü yerdə qərarlaşdığını bildirib. Diplomat vurğulayıb ki, Türkmənbaşı və Konstansa limanları arasında əməkdaşlıq, eləcə də Konstansada Türkmənistan məhsulları üçün regional paylama mərkəzinin yaradılması iki ölkə arasında strateji iqtisadi tərəfdaşlığın əsas sütunlarından birinə çevrilə bilər.
Ekspertlərin fikrincə, bu təşəbbüs reallaşacağı halda Rumıniyanın Konstansa limanının Qara dəniz regionunda enerji qovşağı kimi əhəmiyyəti daha da artacaq. Layihə, eyni zamanda, Avropa İttifaqının enerji mənbələrinin və nəqli marşrutlarının şaxələndirilməsi siyasətinə töhfə verə, Xəzər hövzəsinin enerji resurslarının Avropa bazarına çıxışını genişləndirə bilər.
Qeyd edək ki, Azərbaycan, Gürcüstan, Rumıniya və Macarıstanın iştirak etdiyi AGRI layihəsi Xəzər hövzəsindən təbii qazın Qara dəniz vasitəsilə Avropaya çatdırılmasını nəzərdə tutur və son illərdə Avropanın enerji təhlükəsizliyi baxımından yenidən diqqət mərkəzinə gəlib.
Bölmənin digər xəbərləri
