Koreya parlamentində Azərbaycan-Koreya Respublikası diplomatik münasibətlərinin ildönümünə dair fotosərgi açılıb
Pekin, 7 iyun, AZƏRTAC
İyunun 7-də Koreya Respublikası parlamentinin binasında Azərbaycan və Koreya Respublikası arasında diplomatik münasibətlərin qurulmasının 30 illik yubileyinə həsr olunan dördgünlük fotosərgi açılıb.
Azərbaycanın Koreya Respublikasındakı səfirliyindən AZƏRTAC-a bildiriblər ki, səfirliyin və Koreya Respublikası parlamentində Azərbaycanla əlaqələr üzrə işçi qrupunun birgə təşkil etdiyi sərgidə ötən 30 il ərzində Azərbaycan-Koreya əlaqələrinə, o cümlədən dövlət və hökumət başçılarının, parlament rəhbərlərinin, digər rəsmi şəxslərin qarşılıqlı səfərlərinə, iki ölkə arasında iqtisadi-sosial, hərbi-müdafiə və mədəni-humanitar sahələr üzrə əməkdaşlığa həsr olunmuş şəkillər nümayiş etdirilir.
Sərginin açılış mərasimində Koreya Respublikası parlamentinin deputatları, o cümlədən hakim Xalqın Gücü Partiyasının parlamentdəki fraksiya üzvləri, yerli ictimaiyyətin və medianın nümayəndələri, habelə Azərbaycan icmasının üzvləri iştirak ediblər. Hakim Xalqın Gücü Partiyasının sədri Li Cun-sok mərasimə təbrik göndərib.
Koreya Respublikası parlamentinin keçmiş sədri Park Byonq-soq, hakim Xalqın Gücü Partiyasının parlamentdəki fraksiya rəhbəri Kvon Sonq-donq, parlamentin Koreya-Azərbaycan parlamentlərarası əlaqələr üzrə işçi qrupunun rəhbəri So Byonq-su, işçi qrupunun rəhbər müavini Şin Hyon-yonq Azərbaycanın coğrafi baxımdan Koreya Respublikasından uzaqda olsa da, mədəni kimlik və mentalitet baxımından iki ölkə arasında yaxınlıq olduğunu, xalqlarımızın ortaq dəyərləri paylaşdığını diqqətə çatdırıblar. Koreyalı natiqlər, həmçinin Koreya Respublikası-Azərbaycan əlaqələrinin daha da inkişaf etdirilməsinə ehtiyac duyulduğunu, parlamentin dost ölkələrimiz arasındakı əməkdaşlığa töhfə vermək əzmində olduğunu vurğulayıblar.
Səfir Rəmzi Teymurov Azərbaycanla Koreya Respublikası arasında diplomatik əlaqələrin qurulmasından ötən 30 ildə ölkələrimizin möhkəm ikitərəfli münasibətlər qurmağa nail olduğunu, təmas və mübadilələrin diplomatik təmsilçilik, ali və yüksək səviyyəli səfərlər, müxtəlif tərəfdaşlıq mexanizmləri və layihələri, eləcə də parlament səviyyəsində sıx əməkdaşlıq əlaqələri ilə özünü büruzə verdiyini vurğulayıb.
Hazırda Azərbaycan və Koreya Respublikası arasında xüsusilə iqtisadi sahədə əməkdaşlığın inkişafı üçün geniş imkanların olduğunu vurğulayan səfir R.Teymurov, bu çərçivədə 30 ildən sonra Ermənistan işğalından azad olunmuş Azərbaycan ərazilərində aparılan quruculuq işləri, nəzərdə tutulan layihələr barədə məlumat verib, Azərbaycan tərəfinin Cənubi Koreya şirkətlərinin həmin quruculuq işlərinə dəvət etdiyini bildirib.
Sonra sərgi ilə tanışlıq olub. Tədbir iştirakçılarına Azərbaycan-Koreya Respublikası diplomatik əlaqələrinin 30 illik yubileyi münasibətilə hazırlanmış xatirə broşürləri təqdim olunub. Tədbir yerli media vasitələrində geniş işıqlandırılıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
