Küveytdə 20 Yanvar şəhidlərinin xatirəsi anılıb
Bakı, 22 yanvar, AZƏRTAC
Xalqımızın müstəqillik tarixinə qanlı hərflərlə yazılmış 20 Yanvar faciəsinin 28-ci ildönümü münasibətilə Azərbaycanın Küveytdəki səfirliyində bu ölkədə yaşayan, işləyən və təhsil alan həmvətənlərimizin, Türkiyənin və digər ölkələrin diaspor təşkilatlarının nümayəndələrinin, ictimai-siyasi xadimlərin, Küveytdə oxuyan türkdilli tələbələrin və yerli kütləvi informasiya vasitələri təmsilçilərinin iştirakı ilə anım mərasimi keçirilib.
Səfirlikdən AZƏRTAC-a bildiriblər ki, mərasimdə çıxış edən səfir Elxan Qəhrəman 1990-cı il yanvarın 19-dan 20-nə keçən gecə M.Qorbaçovun birbaşa göstərişinə əsasən keçmiş sovet dövlətinin hərb maşınının Azərbaycan xalqına qarşı həyata keçirdiyi hərbi təcavüzünün insanlığa qarşı törədilmiş ən ağır cinayətlərdən biri olduğu, milli azadlıq və respublikanın ərazi bütövlüyü uğrunda mübarizəyə qalxmış dinc əhaliyə silahlı təcavüz nəticəsində yüzlərlə günahsız insanın qətlə yetirilməsi və yaralanması, totalitar sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirdiyi bərədə mərasim iştirakçılarına məlumat verib, bu qanlı hadisənin və şəhidlərimizin xatirəsinin yaddaşlardan heç zaman silinməyəcəyini vurğulayıb. Eyni zamanda, Azərbaycanın həmin dövrdə Ermənistanın təcavüzünə də məruz qaldığı bildirilib. Belə bir şəraitdə sovet rəhbərliyinin nəinki münaqişənin qarşısını almaq üçün qəti tədbirlər görmədiyi, əksinə, Azərbaycana yeridilən ordu hissələrinin tərkibinə xüsusi təlim keçmiş erməni əsgər və zabitlərin, eləcə də sovet hərbi hissələrində xidmət edən ermənilərin, hətta erməni kursantların da daxil edildiyi diqqətə çatdırılıb.
Faciənin ertəsi günü ümummilli lider Heydər Əliyev Azərbaycanın Moskvadakı daimi nümayəndəliyində bu dəhşətli hadisəyə münasibətini bildirən kəskin bəyanatında Bakıda törədilən qırğınlara siyasi qiymət verilməsini, günahkarların cəzalandırılmasını tələb etməsi, Ulu Öndərin səyləri nəticəsində 20 Yanvar faciəsi barədə həqiqətlərin üzə çıxması, ölkəmizə qarşı həyata keçirilən təcavüzkar siyasətin bütün dünya qarşısında ifşa olunması xüsusi vurğulanıb. Eyni zamanda, hazırda Prezident İlham Əliyev tərəfindən 20 Yanvar şəhidlərinin xatirəsinə böyük hörmət və ehtiramla yanaşıldığı, onların ailələrinə xüsusi diqqət və qayğı göstərildiyi diqqətə çatdırılıb.
Tədbirdə 20 Yanvar, həmçinin Azərbaycanın müstəqilliyi və ərazi bütövlüyü uğrunda canını fəda etmiş şəhidlərimizin xatirəsi bir dəqiqəlik sükutla yad olunub.
Bununla yanaşı, səfirliyin foyesində 20 Yanvar faciəsi ilə bağlı fotosərgi təşkil olunub, faciə haqqında film və kitablar nümayiş etdirilib. Eyni zamanda, səfirliyin faciə ilə əlaqədar bəyanatı Küveytin dövlət, hökumət qurumlarına, parlamentinə, ölkədə akkreditə olunmuş diplomatik nümayəndəliklərə, burada fəaliyyət göstərən ictimai təşkilatlara və kütləvi informasiya vasitələrinə göndərilib.
Bundan başqa, bu ölkənin “Əl-Cəridə” qəzetinin 16 yanvar tarixli buraxılışında “Azərbaycanın Küveytdəki Səfirliyi 20 yanvar faciəsinin 28-ci ildönümünü qeyd edir” və "Əl-Nahar" qəzetinin 19 yanvar tarixli nömrəsində “Azərbaycan səfirliyi sovet təcavüzü nəticəsində 1990-cı ildə həlak olmuş şəhidlərin xatirəsini andı” başlıqlı məqalələr dərc edilib. Məqalələrdə 1990-cı ilin yanvar ayının 20-də keçmiş Sovet ordusunun əsgərləri və qüvvələri tərəfindən doğma yurdunun azadlığının və öz hüquqlarının müdafiəsinə qalxmış Azərbaycan xalqına qarşı insanlıq əleyhinə qatı cinayətin törədildiyi, bu faciə ilə beynəlxalq hüquq normalarının kobudcasına pozulduğu, Bakı şəhərində xüsusi qəddarlıq və misli görünməmiş vəhşiliklər nəticəsində 137 nəfərin qətlə yetirildiyi, 700 nəfərdən çox insanın yaralandığı, 200 mənzilin dağıdılaraq yandırıldığı, 800-dən çox insanın qanunsuz həbs edildiyi qeyd olunub. Bildirilir ki, 20 Yanvar hadisələri zamanı şəhid olanların xatirəsi Azərbaycan xalqının yaddaşında əbədi yaşayacaq.
Yazılarda, həmçinin 1988-ci ildə Sovet İttifaqı Kommunist Partiyasının rəhbərlərinin Azərbaycanın əzəli torpağı olan Dağlıq Qarabağı Ermənistanın tərkibinə daxil edilməsi istiqamətində ciddi cəhdlər göstərdikləri vurğulanıb.
Bölmənin digər xəbərləri
