Laçın-Xankəndi yolunda nəzarət-buraxılış məntəqəsinin yaradılması Azərbaycanın milli təhlükəsizliyi baxımından əhəmiyyətlidir
Bakı, 26 aprel, AZƏRTAC
Azərbaycanın Laçın-Xankəndi yolunda qurduğu sərhəd-buraxılış məntəqəsi ölkəmizin ərazi bütövlü, suverenliyi və milli təhlükəsizliyi baxımından mühüm əhəmiyyət kəsb edir.
Bu fikirləri AZƏRTAC-a açıqlamasında iqtisadçı ekspert Xalid Kərimli söyləyib.
Ekspert bildirib ki, bu addım Azərbaycanın İkinci Qarabağ müharibəsindəki qalibiyyətindən sonra bu istiqamətdə ən böyük nailiyyəti və məntiqi davamıdır. Həmçinin sərhəd-buraxılış məntəqəsinin qurulması ölkəmizə qanunsuz silah daşımalarının da qarşısını alacaq.
“Azərbaycan-Ermənistan sərhədində nəzarət-buraxılış məntəqəsinin qurulması ilə, eyni zamanda, gömrük rejiminin formalaşmasının da şahidi olacağıq. Burada ölkənin gömrük rejimi tətbiq olunacaq. Bu da Azərbaycana imkan verəcək ki, ölkəmiz ərazisində vahid gömrük və vergi rejimi formalaşdırılsın. Çünki bu olmasa, Azərbaycan məcburi şəkildə Qarabağ ətrafında gömrük sistemi formalaşdırmalı olacaqdı ki, oraya gələn mallar digər ölkənin ərazisində problem yaratmasın.
Ümumiyyətlə, bu, ölkəmiz üçün çox mühüm və əhəmiyyətli layihədir. Ölkəmizin ərazi bütövlüyü, suverenliyi və milli təhlükəsizliyi baxımından əhəmiyyətli addımdır. Bundan sonra da yəqin ki, demilitarizasiya prosesinin şahidi olacağıq. Artıq bu regionda daha rahat investisiya və iqtisadi-ticari fəaliyyətlər təmin olunacaq”, - deyə X.Kərimli qeyd edib.
Bölmənin digər xəbərləri
