LƏNKƏRAN DÖVLƏT UNİVERSİTETİNDƏ TƏLƏBƏLƏRLƏ GÖRÜŞ KEÇİRİLMİŞDİR
Toplantı iştirakçıları universitetin akt zalında Azərbaycan Prezidentinin cənub bölgəsinə son səfərini əks etdirən fotosərgi ilə böyük maraqla tanış olmuşlar.
LDU-nun rektoru Asəf İsgəndərov çıxış edərək, bu il ali təhsil ocağına qəbul olunmuş 326 nəfər gənci tələbə adını qazanmaları münasibətilə təbrik etmişdir. Test imtahanlarından yüksək bal toplayanlara tələbə biletləri təqdim olunmuşdur.
Lənkəran Şəhər İcra Hakimiyyətinin başçısı Zeynal Nağdəliyev çıxışında birinci kurs tələbələrinə biliklərə mükəmməl yiyələnməyi, fəal olmağı arzulamış, universitetin 10 əlaçı tələbəsinə hər ay 100 min manat xüsusi təqaüdün verilməsi ilə əlaqədar “Kapital-Bank”ın Lənkəran filialında açılmış əmanət kitabçalarını təqdim etmişdir.
Valideynlər və digər natiqlər çıxış edərək ölkəmizin başçısının aspirantura, dövlət ali, orta ixtisas və peşə məktəblərinin tələbələrinə və şagirdlərinə verilən təqaüdlərin artırılması haqqında Sərəncamının elmin və təhsilin inkişafına göstərilən dövlət qayğısının təzahürü olduğunu söyləmişlər.
Toplantıda Azərbaycan Respublikasının Prezidentinə müraciət qəbul edilmişdir.
Bölmənin digər xəbərləri
