LƏNKƏRAN MÜALİCƏ-DİAQNOSTİKA MƏRKƏZİNİN TİKİNTİSİ İLƏ TANIŞLIQ
Azərbaycan Prezidenti İlham Əliyev müalicə-diaqnostika mərkəzinin tikintisi ilə tanış olmaq üçün fevralın 3-də Lənkəran şəhərinə gəldi. Burada çalışan inşaatçılar dövlətimizin başçısını və onun xanımını hörmət və ehtiramla qarşıladılar, gül dəstəsi təqdim etdilər.
Ötən ilin sentyabrında Prezidentin xeyir-duası ilə təməli qoyulan mərkəzin tikintisində son tamamlama işləri görülür. Smeta dəyəri 32 milyard manat olan yeni səhiyyə ocağının tikintisində “Embavood” MMC-nin inşaatçıları ilə yanaşı, 170 nəfər yerli sakin də çalışır. Mərkəz Almaniyanın “Siemens” şirkətinin istehsalı olan 2,7 milyon dollarlıq tibb avadanlığı ilə təchiz ediləcəkdir.
Prezidentə məlumat verildi ki, əsasən böyrək xəstəliklərinin diaqnostikası və müalicəsi üçün lazım olan avadanlıq dünyanın ən tanınmış və nüfuzlu şirkətləri tərəfindən quraşdırılacaqdır. Burada həmçinin oftalmologiya, kompyuter tomoqrafiyası və kardiologiya kabinetləri də fəaliyyət göstərəcəkdir. Mərkəzin bu ilin birinci yarısında istifadəyə verilməsi nəzərdə tutulmuşdur.
Dövlətimizin başçısı mərkəzin istilik, elektrik enerjisi, su təchizatı ilə maraqlandı, tikinti gedən sahələri gəzdi, bütün işlərin müasir tələblər səviyyəsində görülməsini tövsiyə etdi və müvafiq tapşırıqlarını verdi.
Sonra Prezident İlham Əliyev mərkəzin qarşısına toplaşan inşaatçılar, şəhər sakinləri və səhiyyə işçiləri ilə görüşüb səmimi söhbət etdi. Tikintidə çalışanlar dövlətimizin başçısına müraciətlə dedilər ki, ulu öndər Heydər Əliyevin xidmətləri hamımızın yadındadır. Biz onun varisini həmişə alqışlayır və dəstəkləyirik. Bir neçə il bundan əvvəl iş yeri tapmaq çətin idi. Sizin bölgəmizə diqqət və qayğınız sayəsində bu problem aradan qalxır. Allah Sizə cansağlığı versin. Biz Sizdən çox razıyıq.
Prezident İlham Əliyev təşəkkür edərək vurğuladı ki, indi Bakıda artıq bu, hiss olunur. Əvvəllər Bakıda yerlər var idi ki, oraya fəhlələr toplaşır, iş axtarırdılar. İndi deyirlər ki, onları tapmaq çətindir. Elektrik stansiyaları Azərbaycanın 5 yerində inşa olunur. Amma birincini Astarada tikdik ki, bütün bu bölgə işıqla təmin edilsin. Mən istəyirəm ki, siz razı qalasınız. Mənim başqa məqsədim yoxdur. İstəyirəm ki, insanlar, Azərbaycan xalqı yaxşı yaşasın, iş yeri olsun, yoxsulluq olmasın. Hər bir vətəndaş yaxşı yaşasın və belə də olacaqdır. Bu, indi də var, bundan sonra daha da yaxşı olacaqdır.
Sakinlər və səhiyyə işçiləri də Prezidenti salamlayaraq dedilər ki, Sizin hər gəlişiniz bayramdır və bizə uğurlar gətirir. Biz lənkəranlılar ulu öndərimizin vəsiyyətlərini yerinə yetirən insanlarıq. Həmişə Sizi dəstəkləyirik, Sizə sadiqik. Sizin belə gəlişləriniz çox olacaq və gələcəkdə Lənkəranda çox uğurlu, gözəl işlər görüləcəkdir. Təməlini qoyduğunuz və tezliklə tikintisi tamamlanacaq müalicə-diaqnostika mərkəzi bu bölgədə yaşayan insanlara xidmət edəcəkdir. Sizə dərin minnətdarlığımızı bildiririk, əmin olun ki, həmişə Sizinlə birlikdə olacağıq. Biz Sizi sevirik. Allah Sizi qorusun. Biz Sizi milli maraqlarımızın carçısı kimi tanıyırıq. Bu qayğıya, hörmətə görə təşəkkürümüzü bildiririk. Fəxr edirik ki, bizim belə cavan Prezidentimiz vardır.
Prezident İlham Əliyev təşəkkür edərək dedi: Mən də sizi sevirəm. Çox sağ olun. Çox şadam ki, burada gözəl işlər görülür. Bu mərkəz ən yüksək səviyyədə xidmət göstərəcəkdir. Bu bölgə daha da sürətlə inkişaf edəcəkdir. Mən Lənkərana tez-tez gəlirəm. Bundan sonra da gələcəyəm. Burada o qədər işlər görüləcək, o qədər yeni obyektlər istifadəyə veriləcək ki, onların hamısının açılışına gələcəyəm.
Bölmənin digər xəbərləri
