Lənkəranlı gənclər ekologiya sahəsində idarəetmə biliklərinə yiyələnmişlər
Lənkəran, 10 sentyabr (AZƏRTAC). Lənkəran şəhərində ATƏT-in Bakı ofisi, “Vətəndaş Cəmiyyətində Debat” İctimai Birliyi, Gənclər və İdman, Ekologiya və Təbii Sərvətlər nazirlikləri, IDEA Beynəlxalq Kampaniyası, “Təmiz Şəhər” ASC-nin dəstəyi ilə “Green Corps” (Yay məktəbi) təşkil edilmişdir.
AZƏRTAC xəbər verir ki, tədbirin məqsədi gənclərə ölkəmizin ekoloji menecment, ətraf mühitin mühafizəsi və tədqiqatların düzgün aparılması sahəsində ilkin biliklərin verilməsi, bu sahədə layihələrin düzgün yazılması və idarə edilməsi, dünyagörüşünün genişlənməsi və onların ekoloji fəallara çevrilməsidir.
30 lənkəranlı gəncin iştirak etdiyi yay məktəbində təlim-tədris proqramı çərçivəsində yerli və xarici ekspertlər tərəfindən iştirakçılara ekoloji layihələrin yazılması, idarə olunması, bu sahədə xarici təcrübə və metodologiya haqqında bilik və bacarıqlar aşılanmışdır.
Proqramın davamı olaraq iştirakçılar komandalara ayrılaraq Azərbaycanın cənub bölgəsində olan mövcud ekoloji problemlərin həllinə istiqamətlənmiş layihələr hazırlamışlar.
Komandalar tərəfindən hazırlanmış layihələr müsabiqəyə təqdim edilmişdir. Müsabiqədən uğurla keçən 3 layihənin maliyyələşdirilməsi və oktyabr-noyabr aylarında həyata keçirilməsi nəzərdə tutulmuşdur.
Yay məktəbinin iştirakçılarına, həmçinin asudə vaxtın səmərəli təşkili, biliklərin praktiki məşğələlərlə gücləndirilməsi məqsədi ilə müxtəlif komandaqurucu oyunlar, idman oyunları və əyləncəli tədbirləri özündə birləşdirən mədəni idman proqramı təqdim olunmuşdur.
Bölmənin digər xəbərləri
