Lətif Kərimovun 120 illiyi ilə bağlı AMEA-nın Tədbirlər planı hazırlanacaq
Bakı, 26 may, AZƏRTAC
Azərbaycan Milli Elmlər Akademiyasının (AMEA) Rəyasət Heyətinin növbəti iclasında müzakirə edilən məsələlərdən biri Azərbaycan Prezidentinin “Lətif Kərimovun 120 illiyinin qeyd edilməsi haqqında” 2026-cı il 30 aprel tarixli Sərəncamının icrasından irəli gələn vəzifələr haqqında olub.
Bu barədə AZƏRTAC-a AMEA-dan məlumat verilib.
Məsələ ilə bağlı çıxış edən AMEA-nın prezidenti akademik İsa Həbibbəyli bildirib ki, 2026-cı ilin noyabr ayında Azərbaycan təsviri sənətinin böyük ustası, görkəmli xalçaşünas, pedaqoq və sənətşünas-alim, SSRİ Dövlət mükafatı laureatı, Xalq rəssamı Lətif Kərimovun 120 illiyi tamam olur. Xalq rəssamı Lətif Kərimov Azərbaycanda bu sahədə məktəb yaradıb və xalqımızın xalça ənənələrini dünyada tanıdıb.
Sərəncamın 1-ci bəndində Mədəniyyət Nazirliyi və Azərbaycan Milli Elmlər Akademiyasına Lətif Kərimovun 120 illiyinə dair Tədbirlər planının hazırlanıb həyata keçirilməsinin tapşırıldığını deyən akademik İsa Həbibbəyli bu çərçivədə konfransların, sərgilərin təşkilinin nəzərdə tutulduğunu vurğulayıb.
Rəyasət Heyəti tərəfindən Lətif Kərimovun 120 illiyi ilə bağlı AMEA-nın Tədbirlər planının hazırlanması məqsədilə AMEA-nın elmi bölmə, müəssisə və təşkilatlarına təkliflərin təqdim edilməsi tapşırılıb.
Bölmənin digər xəbərləri
