London həbsxanasının ərazisinə daxil olan etirazçılar saxlanılıb
London, 25 yanvar, AZƏRTAC
Londonun qərbində yerləşən “Wormwood Scrubs” həbsxanasının ərazisinə qanunsuz daxil olduqları iddia edilən 86 etirazçı saxlanılıb.
AZƏRTAC BBC-yə istinadla xəbər verir ki, qrup “Palestine Action” hərəkatı ilə əlaqəli, aclıq aksiyası keçirən bir məhbusun dəstəklənməsi məqsədilə etiraz aksiyası təşkil edib. Etirazçılar polis əməkdaşlarını hədələməkdə, həmçinin həbsxana işçilərinin əraziyə daxil olub-çıxmasına mane olmaqda ittiham edilirlər.
“Prisoners for Palestine” kampaniya qrupu məhbusun 22 yaşlı Muhammad Umer Xalid olduğunu bildirib. Qrupun məlumatına görə, o, cümə günü su içməkdən imtina etməklə aksiyaya başlayıb. U.Xalid ötən ilin iyun ayında “RAF Brize Norton” hərbi bazasına qanunsuz daxil olma işi üzrə məhkəməni gözləyir və ittihamları qəbul etmir.
Polis bildirib ki, etirazçılar ərazini tərk etməkdən imtina etdikləri üçün onların hamısına qarşı ağırlaşdırılmış qanunsuz daxilolma şübhəsi ilə ittiham irəli sürüləcək. Açıqlamada qeyd olunub ki, bəzi şəxslər həbsxana binasının işçilər üçün nəzərdə tutulan giriş hissəsinə daxil olmağa da müvəffəq olublar. Ədliyyə Nazirliyinin sözçüsü isə baş verənləri tamamilə qəbuledilməz eskalasiya adlandırıb. Sözçü həmçinin vurğulayıb ki, dinc etiraz hüququ dəstəklənsə də, əraziyə qanunsuz daxilolma və əməkdaşlara qarşı təhdidlər ciddi narahatlıq doğurur. “Prisoners for Palestine” isə polisin hərəkətlərini zorakı və həddindən artıq qeyri-mütənasib reaksiya kimi qiymətləndirib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
