Londondakı “Saatchi” qalereyasında “Beyond Fashion” sərgisi açılıb
Bakı, 8 iyun, AZƏRTAC
Böyük Britaniyanın paytaxtındakı “Saatchi” qalereyasında London Moda Həftəsinin 40-cü ildönümünün bir hissəsi kimi təqdim edilən və 2024-cü ilin yay mövsümündə əsas sərgi olacaq “Beyond Fashion” sərgisi açılıb.
AZƏRTAC qalereyanın rəsmi saytına istinadla xəbər verir ki, ekspozisiya dörd hissədən – “Cazibədarlıq”, “Fantaziya”, “Realizm” və “Sürrealizm” bölmələrindən ibarətdir və moda fotoqrafiyasının (fashion photography) reklam məhsullarının sadə təqdimatdan gündəlik həyatın nümayişinə necə keçdiyini və hansı yolla müstəqil sənət növünə, sadə kommersiya texnikasından üstün texnologiyaya çevrildiyini müşahidə etməyə imkan verir.
“Beyond Fashion” sərgisi, Peter Lindberq, Maylz Oldric, Nik Nayt və Ellen fon Unvort da daxil olmaqla dünyanın ən məşhur moda fotoqraflarının 100-dən çox fotoşəklindən ibarətdir. Bütün bu əsərlər sərginin kuratoru, həm də Lozannadakı (İsveçrə) “Photo Elysee” qalereyasının direktoru Natali Herşdorfer tərəfindən diqqətlə seçilib. Bu sahədəki ən məşhur adlarla yanaşı, yeni nəsil moda fotoqraflarının yaradıcılığı və innovativ baxışları da təqdim olunur.
“Cazibədarlıq” bölməsi zamansız gözəlliyin tərənnümüdür, “Fantaziya” isə moda fotoqraflarının sonsuz ixtiraçılıq təxəyyülünü əks etdirir. “Realizm” bölməsi əsasən küçə fotoqraflarına (street-style) həsr olunub və modanın real dünya ilə kəsişməsini ətraflı şəkildə araşdırır. Nəhayət, “Sürrealizm”, moda fotoqrafiyasına transformasiya, təxəyyül və sehrbazlıq kimi yanaşan yeni nəslin əsərlərini nümayiş etdirir.
Sərginin kuratoru Natali Herşdorfer deyir: “Bir vaxtlar moda fotoqrafiyası kommersiya istifadəsi ilə məhdudlaşdırılmış bir sənət kimi qəbul edilib. İnternet və sosial şəbəkələrin sürətli inkişafı nəticəsində fotoşəkillərin sənədləşdirilməsi, istehlakı və paylanması üsulları transformasiyaya məruz qalıb. Daha geniş vizual dilin ortaya çıxması, moda fotoqrafiyasında redaksiya işi, reklam və bədii ifadə arasındakı sərhədləri aradan qaldırıb. O artıq qeyri-ciddi vasitə sayılmır, əksinə, muzey və qalereyaların, hərrac evlərinin və naşirlərin diqqətini cəlb edən sənət forması səviyyəsinə yüksəlib. O, sənət dünyasının parlayan ulduzudur.”
“Beyond Fashion” sərgisi, müasir mədəniyyətdəki ən məşhur obrazlardan, məşhur simalardan və dinamik markalardan bəzilərini təqdim edib. Klassik “VOGUE” sərlövhələrindən “Marc Jacobs” çantalarındakı Victoriya Bekhemin ayaqlarına qədər təsvirlərin olduğu bu kolleksiyada Naomi Kempbell, Keyt Moss və Kristi Terlinqton kimi supermodellərin və ulduzların, Kristian Dior, Komm de Qarson, Aleksandr Makkuin və Valentino kimi dizaynerlərin əsərləri və “The Sartorialist” küçə tərzinin əfsanələri var.
Geniş moda fotoşəkilləri ilə yanaşı, “Beyond Fashion”da hərəkətli şəkillərə həsr olunmuş bölmədə rəqəmsal kinodan moda nümayişi vasitəsi kimi istifadə edən ilk və ən məşhur təsvir istehsalçılarından olan məşhur ingilis fotoqrafı Nik Naytın təsisçisi və rəhbəri olduğu “SHOWstudio” veb-saytındakı əl işləri təqdim olunur. 2000-ci ildə “Moda filmləri evi” olaraq qurulan studiya, yenilikçi layihələri ilə modanın onlayn olaraq necə tərtib olunduğunu sənətsevərlərə çatdırıb.
Sərgi, ziyarətçiləri moda obrazları ilə qarşılıqlı əlaqənin alternativ və dinamik yolu ilə tanış olmağa dəvət edən “Under Your Smell” adlı installyasiya ilə başa çatır. Lozannadakı İncəsənət və Dizayn Universitetinin ECAL Fotoqrafiya fakültəsinin tələbələri “Jean-Paul Gaultier” ətirlərinin vizual interpretasiyasını təqdim edirlər.
“Beyond Fashion” sərgisi Londonun “Saatchi” qalereyasında 8 sentyabr 2024-cü il tarixinədək davam edəcək.
Bölmənin digər xəbərləri
