MAGİSTRATURA PİLLƏSİNDƏ TƏHSİL ALMAQ ÜÇÜN 15 MİNDƏN ARTIQ BAKALAVR SƏNƏD VERMİŞDİR
AZƏRTAC xəbər verir ki, iyunun 20-də Tələbə Qəbulu üzrə Dövlət Komissiyasının (TQDK) sədri Məleykə Abbaszadə kütləvi informasiya vasitələri üçün brifinq keçirmişdir.
M.Abbaszadə bildirmişdir ki, bu gün TQDK rus bölməsi abituriyentləri üçün “Azərbaycan dili” fənni üzrə Bakı və Naxçıvan şəhərlərində imtahan keçirir. Bu imtahanda 3 mindən çox abituriyent iştirak edir. İmtahandan uğur qazanmayan abituriyentlər əsas imtahanlara buraxılmayacaqlar.
TQDK-nın sədri demişdir ki, magistraturaya imtahanlar iyunun 22-də keçiriləcəkdir. Bu il magistratura pilləsində təhsil almaq üçün nəzərdə tutulmuş 4809 yerə 15124 bakalavr sənəd vermişdir.
Diqqətə çatdırılmışdır ki, Sənəd Qəbulu Komissiyalarında hər bir bakalavra pulsuz “Yaddaş kitabçası” təqdim olunmuşdur. Kitabçada imtahana mobil telefon, konspekt, tədris vəsaitləri və bu kimi yardımçı vasitələr gətirməyin qəti qadağan olunduğu xüsusi vurğulanır.
M.Abbaszadə demişdir ki, imtahan binasına giriş zamanı üzərində mobil telefon, konspekt və digər yardımçı vasitələr aşkar olunan bakalavrlar barədə akt tərtib olunacaq və onlar imtahana buraxılmayacaqlar.
Sonda jurnalistlərin sualları cavablandırılmışdır.
Bölmənin digər xəbərləri
