MALİYYƏ NAZİRLİYİ MƏTBUAT XİDMƏTİNİN MƏLUMATI
Avqustun 16-da respublika Maliyyə Nazirliyində rayon, şəhər maliyyə idarələri rəhbərlərinin iştirakı ilə dövlət maliyyə intizamının yüksəldilməsi tədbirlərinə həsr olunmuş geniş müşavirə keçirilmişdir.
Müşavirədə çıxış edən maliyyə naziri Əvəz Ələkbərov bildirmişdir ki, Azərbaycan Prezidenti cənab Heydər Əliyevin rəhbərliyi ilə ölkədə həyata keçerilən iqtisadi xəttin tərkib hissəsi olan büdcə-vergi siyasəti cari ildə də uğurla davam etməkdədir.
Əldə edilmiş makroiqtisadi sabitliyin daha da möhkəmləndirilməsi, büdcənin səmərəsiz xərclərdən təmizlənərək onun strukturunun təkmilləşdirilməsi və şəffaflığının artırılması, dövlətin malik olduğu maliyyə vəsaitlərinin qorunması, məqsəd və təyinatlara qənaətlə istifadə olunması məqsədi ilə Xəzinədarlıq sistemində nəzarət funksiyaları daha da möhkəmləndirilmiş, öhdəlik və alışlar sisteminin tətbiqi nəticəsində büdcə təşkilatları tərəfindən lüzumsuz borclar alınmasının qarşısını kəsmək mümkün olmuşdur.
Bütün bunlar dövlət büdcəsində nəzərdə tutulmuş vəsaitlərin birbaşa son təyinatına çatdırılmasını, dövlət xərclərinin yalnız qəbul edilmiş öhdəliklər həddində yaranan borcların ödənilməsinə yönəldilməsini, xərc smetalarında nəzərdə tutulan limitlər gözlənilməklə vəsaitlərdən məqsədyönlü və düzgün istifadə olunmasını təmin etmişdir. Büdcə təşkilatlarının həyata kecirdiyi alışların xəzinə uçotuna qəbul edilməsi kreditor borclarının məbləğini son dövrlərdə kəskin surətdə - on dəfələrlə azaltmağa imkan vermişdir. Hazırda xəzinə işlərinin keyfiyyətini artırmaq məqsədi ilə Xəzinədarlıq sisteminin tam avtomatlaşdırılması və kompüterləşdirilməsi, bütün maliyyə qurumlarını əhatə edən lokal şəbəkənin yaradılması üçün müvafiq işlər görülür və bu istiqamətdə səylər daha da gücləndiriləcəkdir.
Müşavirədə vurğulanmışdır ki, Azərbaycan Respublikasında maliyyə nəzarətinin daha da təkmilləşdirilməsi barədə Respublika Prezidentinin fərman və göstərişlərindən irəli gələn vəzifələrin icrası və bu sahədə Maliyyə Nazirliyinin qarşısında qoyulmuş tələblərin yerinə yetirilməsi məqsədi ilə məqsədyönlü işlər görülür. Bu ilin 6 ayı ərzində 80 büdcə təşkilatında və hüquq-mühafizə orqanlarının qərarlarına əsasən 22 müəssisə və təşkilatda təftiş aparılmış, qanunsuz xərclərə və artıq ödəmələrə, həmçinin pul vəsaitləri və mal-material qiymətlilərinin israfçılığına yol verilməsi faktları aşkar edilərək, vəsaitlərin xeyli hissəsinin büdcəyə bərpası təmin olunmuş, 25 təftiş materialı aidiyyatı üzrə hüquq-mühafizə orqanlarına göndərilmişdir. Bununla belə görüləsi işlər hələ çoxdur.
Nəzərə çatdırılmışdır ki, Azərbaycan Respublikası Prezidentinin “Hökumət zəmanəti ilə alınan kreditlərin qaytarılmasına nəzarətin güücləndirilməsi tədbirləri haqqında” 11 iyun 2001-ci il tarixli Fərmanından irəli gələn vəzifələrin yerinə yetirilməsi üçün konkret addımlar atılmışdır. Belə ki, Nazirlər Kabinetinin qərarına əsasən hökumət zəmanəti ilə kredit almış dövlət müəssisə və təşkilatlarında kreditlərin vaxtında qaytarılmasına nəzarət edəcək Maliyyə Nazirliyin nümayəndəsinin səlahiyyətləri müəyyən olunmuşdur. Hökumət zəmanəti ilə alınan kreditlərin qaytarılmasına nəzarət mexanizmi sentyabrın 1-dən işə düşəcəkdir.
Müşavirənin sonunda rayon, şəhər maliyyə idarələrinin rəhbərlərinə dövlətin maliyyə vəsaitlərinin idarə olunmasına nəzarətin daha da artırılması ilə bağlı konkret tapşırıqlar verilmiş və bildirilmişdir ki, ölkə Prezidentinin iqtisadi siyasətinə uyğun olaraq, Maliyyə Nazirliyi dövlət vəsaitlərinin xərclənməsinin tam səmərəliliyini təmin etmək istiqamətində öz fəaliyyətini daha da gücləndirəcəkdir.
Müşavirədə Azərbaycan Prezidenti cənab Heydər Əliyeüə müraciət qəbul olunmuşdur.
Bölmənin digər xəbərləri
