MALLI-ŞIXLI KƏND ORTA MƏKTƏBİNİN MÜƏLLİMİ NAİLƏ QƏDİROVANIN ÇIXIŞI
- Əziz göyçaylılar!
İcazə verin, sizin adınızdan cənab İlham Əliyevi, onun xanımı, YUNESKO-nun xoşməramlı səfiri, Heydər Əliyev Fondunun prezidenti Mehriban Əliyevanı və ulu öndərimizin nəvəsi Leylanı salamlayım, onlara “Xoş gəlmisiniz!” deyim.
Əziz göyçaylılar!
Bu gün Göyçay tarixi günlərini keçirir. Ona görə ki, ulu öndərimizin yeganə varisi, təbiətin şah əsəri, poeziyamızın şah beyti, XV əsrin qılınc və qələm abidəsi Şah İsmayıl Xətai səviyyəsinə yüksələn, Heydər Əliyev ideyalarının davamçısı, yolunu gözlədiyimiz İlham Əliyev rayonumuza gəlmişdir. Qədəmləriniz mübarək olsun!
Dünya tarixində Yer adlı planetin gözəl bir guşəsi var. O, dilindən, milliyyətindən, irqindən, dost və düşməninin istəyindən asılı olmayaraq, inkişaf edən Azərbaycandır. Azərbaycan uluların əmanətidir. Heydər Əliyev isə onun etibarlı dayağı olmuşdur. Bu gün estafet onun varisi cənab İlham Əliyevdədir. İlham Əliyevə eşq olsun!
Cənab Prezident, Heydər Əliyev bir neçə dəfə Göyçay rayonuna gəlmiş, sakinlərlə ünsiyyətdə olmuş, problemləri ilə maraqlanmışdır. Göyçayda Əlvan çayı var, o həmişə daşıb ailələrə fəlakət gətirirdi. Onun qarşısına bənd çəkmək üçün ancaq Heydər Əliyev kömək elədi və bənd çəkildi, əhali qorxudan qurtardı. Heydər Əliyevin Azərbaycanın bütün rayonlarında yadigarları var. Ancaq Göyçaydakı yadigarları xüsusi yer tutur. Tikilən beşmərtəbəli binalar, dövlət və iaşə müəssisələri, salınan körpülər - hamısı Heydər Əliyevin yadigarlarıdır.
Cənab Prezident!
Heydər Əliyev haqqında çox danışmışıq. Bir neçə gün bundan əvvəl, onun möhtəşəm abidəsinin açılışını göyçaylılar həm sevinclə, həm də kədərlə qarşıladılar. Amma tarix boyu xeyir şərə, sevinc kədərə qalib gəlir.
Əziz nikbin göyçaylılar!
Əziz hörmətli Prezidentimiz!
Şirvan zonasının cənnətməkanı Sizi bağrına basır və qucaqlayır. İlham Əliyevə eşq olsun!
Cənab Prezident, üç il bundan əvvəl, Göyçay bu vəziyyətdə deyildi, xoşagələn deyildi. Lakin Sizin düzgün kadr siyasətinizin nəticəsidir ki, bu gün Göyçay şəhərlər sırasında cənnətə dönübdür. İcra hakimiyyətinin başçısı Nazim İsmayılov əlindən gələni edir. Kaş, hər yerdə belə olaydı. Göyçaylılara, onların rifah halının yaxşılaşmasına qayğı, iri binaların tikilməsi, cənnətə oxşayan Heydər Əliyev seyrəngahının salınması, Uşaq Əyləncə Mərkəzinin istifadəyə verilməsi, şəhidlər xiyabanının abadlaşdırılması - bunların hamısı icra hakimiyyəti başçısının tələbkarlığı və şəxsi nəzarətinin nəticəsidir. Mən göyçaylılar adından ona təşəkkürümü bildirirəm.
Cənab Prezident, biz göyçaylılar Sizin regionlara səfərlərinizi televiziya qarşısında oturub diqqətlə izləyir və əlimizi göyə qaldırıb Ulu Tanrıya dua edirik. Mən bəxtəvərəm ki, indi Sizin yanınızdayam, o duaları Sizə deyəcəyəm.
Cənab Prezident, 11 ayın sultanı Ramazan ayıdır. Siz bu ayın ərəfəsində hakimiyyətə gəlmisiniz. Bu, Ulu Peyğəmbərimizin xeyirli, bərəkətli ayıdır. Sizin ayağınız xeyirli, bərəkətlidir. Arzu edirəm, həmişə belə olsun. Sizin seçkiqabağı verdiyiniz vədlər hissə-hissə həyata keçirilir. Bütün rayonlarda, o cümlədən Göyçay rayonunda işsizlik aradan qaldırılır, işçilərin əmək haqqı artırılır, minimum əmək haqqı qaldırılır. Ulu Peyğəmbərdə olduğu kimi, Sizdə də insanı bağışlamaq qabiliyyəti var və əfv Fərmanlarınız neçə-neçə evlərə sevinc gətirdi. Onu da demək istəyirəm ki, Sizin hakimiyyətdə olduğunuz dövrdə xarici ölkələrə səfərlərinizi də çox dərindən, səmimi şəkildə götür-qoy edirik.
Əziz İlham Əliyev, göyçaylılar Sizin daxili və xarici siyasətinizi dəstəkləyir, müdafiə edirlər. Göyçaylılar həmişə Sizinlədirlər. Göyçaylılar Sizi ömürlük Prezident görmək istəyirlər.
Göyçaylılar eşidiblər ki, Siz burada Olimpiya idman kompleksi tikdirmək fikrindəsiniz. Bu, göyçaylıların ürəyindəndir. Gün o gün olsun ki, kompleks hazır olsun, Siz də onun açılışında iştirak edəsiniz.
Qarşıdan parlament seçkiləri gəlir. İnanın ki, göyçaylılar bu seçkilərin şəffaf, yüksək səviyyədə, demokratik şəkildə keçirilməsində fəal iştirak edəcəklər. Damarında müsəlman qanı axan hər bir azərbaycanlı bu cür etməlidir.
Əzizimiz Mehriban xanım, Heydər Əliyev Fondunun uşaq müəssisləri ilə bağlı fəaliyyətini alqışlayırıq. Siz rayonda məktəbin tikintisinə kömək edirsiniz, çox sağ olun. Göyçaylıların bir arzusu var. Biz sizin razılığınızla deputatlığa namizədliyinizi irəli sürmək istəyirik.
Cənab Prezident, gün o gün olsun, Qarabağımız azad edilsin. Siz öz əllərinizlə Qarabağa Azərbaycanın üçrəngli bayrağını sancasınız və onda ulu öndərimizin ruhu şad olar.
Yaşasın bayrağı bayraqlar içində olan, imzası imzalar içində seçilən müstəqil Azərbaycan!
Şəxsiyyəti bütün dünya prezidentlərinə nümunə olan, - Ulu Tanrı bədnəzərdən saxlasın, - gəncliyin dostu cənab İlham Əliyevə eşq olsun!
X X X
Azərbaycan Prezidenti İlham Əliyev görüşdə nitq söylədi.
(Dövlətimizin başçısının nitqi qəzetin bugünkü nömrəsinin birinci səhifəsində dərc olunmuşdur).
X X X
Prezident İlham Əliyev sakinlərlə bir daha səmimiyyətlə görüşdü, ona göstərilən ehtirama görə təşəkkürünü bildirdi. Göyçaylılar dövlətimizin başçısına və ailə üzvlərinə ən xoş diləklərini çatdırdılar, ümummilli lider Heydər Əliyevin siyasətinin davam etdirilməsinə bundan sonra da yardımçı olacaqlarını vurğuladılar.
Bölmənin digər xəbərləri
