Mama-ginekoloq: Mentalitetimizi müasirləşdirə və savadlı cəmiyyətə uyğunlaşdıra bilmişik
Bakı, 24 noyabr, AZƏRTAC
Əvvəlki illərə baxanda qadınlar ginekoloji sağlamlıqları ilə bağlı daha çox məlumatlıdırlar. Bu, ölkədə aparılan maarifləndirmə işlərinin nəticəsidir. Zərif cinsin nümayəndələri öz sağlamlıqlarına daha çox diqqət ayıra bilirlər. Xüsusilə də icbari tibbi sığortanın işə başlaması qadınlara bu işdə çox böyük yardım edir. Maddi cəhətdən çətinlik çəkən qadınlar hazırda icbari tibbi sığorta ilə kifayət qədər geniş müayinələrdən keçə bilirlər.
Bunu AZƏRTAC-a müsahibəsində Bakı Sağlamlıq Mərkəzinin qadın məsləhətxanasının şöbə müdiri, tibb üzrə fəlsəfə doktoru, mama-ginekoloq Elnarə Məstiyeva deyib.
Mama-ginekoloqun sözlərinə görə, bu gün Bakıda keçirilən “Minimal və endo-vizual ginekologiya” beynəlxalq elmi-praktik konfransının müzakirə mövzularından biri də qız uşaqlarının vaxtında müayinə və müalicəsidir: "Əvvəllər mentalitetə görə qız uşaqlarını ginekoloqa aparmaq ayıb sayılırdısa, valideynlər şikayətləri ört-basdır eləməklə məşğul idilərsə, indi nə valideynlər bundan çəkinir, nə də qızlarımız. Hətta yeniyetmə qızlar da öz sağlamlıqları barədə kifayət qədər biliklidirlər. Onlar şikayətləri olanda vaxtında həkimə müraciət edirlər ki, bu da bir çox yeniyetmə patologiyalarının gecikmiş yox vaxtında diaqnostikasına gətirib çıxarır və onlara erkən yardım göstərilir. Mentalitetimizi müasirləşdirə və savadlı cəmiyyətə uyğunlaşdıra bilmişik.
Təbii ki, şəhərdə vəziyyət rayonlardan fərqlidir. Rayonlarda, kəndlərdə həkimə getməkdən daha çox el arasında istifadə olunan türkəçarələrdən istifadə edənlər çoxdur. Bir-birilərinə əsaslandırılmamış müalicə təqdim edənlər var. Müayinədən keçmədən və həkim təyinatı olmadan müxtəlif dərman vasitələrindən istifadə edənlər az deyil. Təbii ki, bu, xoşagələn hal deyil. Buna baxmayaraq, hazırda paytaxtla yanaşı, rayonlarımızda yaşayan vətəndaşlar da çox maarifləniblər, savadlı insanlar kifayət qədər çoxdur.
İcbari tibbi sığortanın rayonlarda da tətbiqi qadınların daha geniş müayinəsinə gətirib çıxaracaq. Bundan əlavə, ginekoloqlarımız rayonlara müayinə və müalicələr üçün ezamiyyətlərə gedir, rayonlardakı vətəndaşların düzgün müayinəsinə kömək edirlər".
Erkən evliliyin qadınların sağlamlığına vurduğu ziyandan danışan mütəxəssis bildirib ki, erkən yaşlarda qızlarda reproduktiv sistem tam formalaşmadığı üçün evlilik travmatizatordan tutmuş müəyyən resursların tükənməsinə, həm hormonal, həm də metobolik proseslərdə iştirak edən resursların stres halına gətirilməsinə səbəb olur ki, bu da müxtəlif fəsadlar yaradır. Nəticədə qadın orqanizmində müxtəlif xəstəliklərə yol açılır. Həmin qızlar ailə qurandan sonra hamiləlik baş verir. Kifayət qədər resurslara sahib olmayan orqanizmin inkişaf etdirdiyi hamiləlik də sağlam olmur və qeyri-sağlam nəslin dünyaya gəlməsi ilə nəticələnir. Odur ki, qızlar tam reproduktiv yaşa çatmadan tam hamiləlik mümkün deyil. Onların hamiləlikdən qorunma üsulları barədə də məlumatlandırılması vacibdir.
Bölmənin digər xəbərləri
