Martin Brandl: Monako mərhələsi təqvimdə olmalıdır
Bakı, 27 dekabr, AZƏRTAC
Formula 1 uzun şübhələrdən və təşkilatçılar tərəfindən bir sıra şərtlər yerinə yetirildikdən sonra Monako Qran-Prisinin keçirilməsi ilə bağlı müqavilənin müddətini 2025-ci ilədək artırıb. Bu isə o deməkdir ki, tezliklə danışıqlar yenidən başlanacaq.
AZƏRTAC xarici KİV-lərə istinadla xəbər verir ki, Formula 1 yürüşlərinin sabiq pilotu, “Sky Sport F1”in şərhçisi Martin Brandlın fikrincə, ən elitar mərhələnin statusunun yerinin Mayami və Las-Veqas tərəfə dəyişməsinə baxmayaraq, Knyazlıqda mərhələni qoruyub saxlamaq lazımdır.
“Bu gün Formula 1-in tacında xeyli qiymətli daş-qaş var. Mən yürüşlərdə iştirak etdiyim zaman inci yalnız bir ədəd - Monako idi. İndi isə təqvimdə Sinqapur, Əbu-Dabi, Ciddə, Bəhreyn, Mayami, Veqas kimi fövqəladə yerlər var. Fikrimcə, yeni və tarixi traslar arasında balans lazımdır. Formula 1-in 73 illik irsi var və siz ürəyiniz istədiyiniz qədər yeni traslar yarada bilərsiniz. Lakin onların Spa, Montsa, Suzuka, Silverstoun, Monako kimi əfsanəvi olmaları üçün hələ çox müddət keçəcək. Monakoda əksər hallarda darıxdırıcı yürüşü bəzən yağış və yaxud təhlükəsizlik avtomobilinin çıxışı canlandırsa da, əvəzində Knyazlıqda təsnifat yürüşləri çox maraqlı keçir”, - deyə M.Brandl əlavə edib.
Bölmənin digər xəbərləri
