MDU-da Elmi Şuranın növbəti iclası keçirilib
Bakı, 2 fevral, AZƏRTAC
Mingəçevir Dövlət Universitetinin (MDU) Elmi Şurasının növbəti iclası keçirilib.
Universitetdən AZƏRTAC-a bildirilib ki, rektor Şahin Bayramov yeni təqvim ilində MDU Elmi Şurasının fəaliyyətinə uğurlar diləyib və iclasın gündəliyi barədə məlumat verib.
Əvvəlcə “Mingəçevir Dövlət Universiteti 2030: İnkişaf Strategiyası” əlavə və dəyişikliklərlə yeni redaksiyada müzakirəyə çıxarılıb. Ş.Bayramov sənəd barədə ətraflı məlumat verib, nəzərdə tutulan strateji məqsədlər, hədəflər və fəaliyyətlər, o cümlədən müəyyən edilmiş əsas göstəricilər haqqında danışıb. MDU-nun mövcud və potensial imkanları, qabaqcıl yerli və xarici universitetlərin təcrübələri nəzərə alınmaqla hazırlanmış “Mingəçevir Dövlət Universiteti 2030: İnkişaf Strategiyası” yeni redaksiyada geniş müzakirələrdən sonra qəbul edilib.
İclasda “MDU-da bakalavriat və magistratura səviyyələri üzrə təcrübələrin təşkili” haqqında hesabat da dinlənilib.
Aparılan müzakirələrdən sonra müvafiq təklif və tövsiyələr nəzərə alınmaqla hesabat qəbul olunub.
Daha sonra MDU əməkdaşlarının əməkhaqlarının artırılması məsələsinə baxılıb. Aparılan müzakirələrdən sonra əməkhaqqı səviyyəsinin orta hesabla 11,8 faiz artırılması barədə qərar verilib.
Elmi Şuranın iclası cari məsələlərin müzakirəsi ilə yekunlaşıb.
Bölmənin digər xəbərləri
