MDU-nun Türkiyə universitetləri ilə əməkdaşlıq əlaqələri barədə fikir mübadiləsi aparılıb
Bakı, 2 fevral, AZƏRTAC
Türkiyə Respublikasının Gəncə şəhərindəki Baş konsulu Recep Öztop Mingəçevir Dövlət Universitetində (MDU) olub. Ziyarət çərçivəsində Baş konsul universitetin rektoru Şahin Bayramovla görüşüb.
Universitetdən AZƏRTAC-a bildirilib ki, görüşdə ali təhsil ocağının əməkdaşları, eləcə də MDU-da fəaliyyət göstərən türkiyəli qonaq professorlar iştirak ediblər.
Baş konsulun universitetə gəlişindən məmnunluğunu bildirən Ş.Bayramov təhsil sahəsinə verdiyi önəmə görə qonağa təşəkkür edib. MDU-nun mövcud potensialından və strateji hədəflərindən bəhs edən rektor müasirləşmə yolunda qardaş Türkiyənin nüfuzlu universitetləri ilə əməkdaşlığın əhəmiyyətini vurğulayıb.
Səmimi qarşılanmaya görə minnətdarlığını bildirən R.Öztop MDU-da olmaqdan məmnunluğunu ifadə edib. Baş konsul qarşılıqlı hörmətə, dostluğa və qardaşlığa əsaslanan Azərbaycan-Türkiyə əlaqələrinin bütün sahələrdə yüksələn xətlə inkişaf etdiyini deyib, ali təhsil sahəsində əməkdaşlığın daha da gücləndirilməsinin vacibliyindən danışıb.
Sonra görüşdə MDU-nun Türkiyə universitetləri ilə qarşılıqlı faydalı əməkdaşlığının genişləndirilməsinin potensial istiqamətləri barədə fikir mübadiləsi aparılıb və bu istiqamətdə Bas Konsulluğun müvafiq dəstəyi ifadə olunub.
Bölmənin digər xəbərləri
