MƏCBURİ KÖÇKÜNLƏRİN SOSİAL PROBLEMLƏRİ HƏLL EDİLİR
Məcburi Köçkünlərin Sosial İnkişaf Fondunun (MKSİF) ictimaiyyətlə əlaqələr bölməsindən AZƏRTAC-a bildirmişlər ki, bu ailələrin sıx şəkildə yaşadıqları ərazilərdən MKSİF-ə daxil olmuş 300-dək ərizədə həmin bölgələrdə məktəb tikintisi, sinif otaqlarının bərpası, yol şəbəkəsinin qaydaya salınması, içməli suya olan ehtiyacın ödənilməsi kimi məsələlər qaldırılmışdır. Qurumun əməkdaşları yerlərdə olmuş, icra hakimiyyəti orqanlarının, məcburi köçkün ailələrinin nümayəndələri ilə görüşüb məsləhətləşmələr aparmışlar. Müraciətlərə əsasən, Füzuli rayonunun Horadiz qəsəbəsindəki 1 nömrəli məktəbin dam örtüyü yenidən qurulacaq, rayonun ərazisində daxili yol şəbəkəsi bərpa ediləcək, subartezian quyuları qazılacaqdır.
Ağcabədi rayonundakı “Taxta körpü” qış yataqlarında məskunlaşmış laçınlı ailələrin sosial ehtiyaclarının həlli yenə də diqqət mərkəzindədir. Buradakı Daşlı, Mirik binələrinə gedən daxili yol şəbəkəsi qaydaya salınacaqdır.
Əzizbəyov, Beyləqan, Abşeron və digər rayonlarda da zəruri mikrolayihələrin həyata keçirilməsi nəzərdə tutulmuşdur.
Bölmənin digər xəbərləri
