Media: Payız aylarında rekord sayda ukraynalı gənc Polşaya gəlib
Bakı, 3 dekabr, AZƏRTAC
2025-ci ilin payız ayları ərzində 18-22 yaş arası 120 mindən çox ukraynalı gənc Polşaya gəlib.
AZƏRTAC xəbər verir ki, “Rzeczpospolita” qəzeti bu barədə Polşa Sərhəd Mühafizə Xidmətinə istinadla məlumat yayıb. Məlumata görə, bu, 2022-ci ilin fevralından bəri üçaylıq dövr üçün rekord göstəricidir. Polşaya gələn gənclərdən 59 mini Ukraynaya qayıdıb, 62 mini isə Polşada qalıb və ya Avropa İttifaqının digər ölkələrinə keçib.
Nəşr yazır ki, ölkəyə gələn ukraynalı gənclərin 39 faizi Polşada əsasən tikinti sahəsində iş tapıb. Eyni zamanda, 2025-ci ilin ilk altı ayı ərzində ukraynalı qaçqınlar Polşada təxminən 5400 müxtəlif cinayət törədiblər.
Qeyd edək ki, avqustun 12-də Ukraynanın dövlət başçısı Volodimir Zelenski 18-22 yaş arası kişilərin sərhədi keçməsini sadələşdirmək barədə hökumətə göstəriş verib.
Bu yaş qrupunda olan Ukrayna vətəndaşlarının kütləvi axını Almaniya və İsveçdə də qeydə alınıb.
Bölmənin digər xəbərləri
