Media: Qrenlandiyanın satın alınması ABŞ-a 700 milyard dollara başa gələ bilər
Bakı, 14 yanvar, AZƏRTAC
Prezident Donald Tramp razılaşmaya nail olarsa, ABŞ Qrenlandiyanı satın almaq üçün 700 milyard dollar ödəyə bilər.
AZƏRTAC xəbər verir ki, “NBC” telekanalının yaydığı məlumata görə, Qrenlandiyanın satın alınmasını qiymətləndirmək üçün alim mütəxəssislər və sabiq məmurlar cəlb olunub. Onların fikrincə, ABŞ Arktikadakı əsas rəqiblərinə qarşı strateji bufer yaratmaq üçün adanı hökmən almalıdır.
Tramp Qrenlandiyanın ABŞ-a birləşdirilməsinin vacibliyini dəfələrlə qeyd edib. Birinci prezidentliyi zamanı o, Qrenlandiyanı pulla almağı təklif edib, 2025-ci ilin martında isə adanın ilhaq edilə biləcəyinə əminliyini dilə gətirib. Onun fikrincə, ABŞ bunu etmədiyi təqdirdə, ada Rusiya və ya Çinin əlinə keçə bilər.
Ağ Evin aparat rəhbərinin müavini Stiven Miller isə öz növbəsində Danimarkanın Qrenlandiyaya nəzarət hüququnu şübhə altına alıb və onun ABŞ-ın bir hissəsinə çevrilməli olduğunu bildirib.
Xatırladaq ki, Qrenlandiya Danimarkanın muxtar ərazisidir. 1951-ci ildə Vaşinqton və Kopenhagen NATO üzrə müttəfiqlik öhdəliklərinə əlavə olaraq, Qrenlandiyanın müdafiəsinə dair müqavilə imzalayıblar. Həmin müqaviləyə əsasən, ABŞ adanı potensial təcavüzdən qorumağı öhdəsinə götürüb.
Bölmənin digər xəbərləri
