MƏHKƏMƏ HAKİMLƏRİ VƏ KİV NÜMAYƏNDƏLƏRİNİN BİRGƏ MƏTBUAT KONFRANSI
Ümumi Məhkəmə Hakimləri Assosiasiyası İctimai Birliyinin sədri Ələddin Cəfərov, Mətbuat Şurasının sədri Əflatun Amaşov, İxtisaslaşdırılmış Məhkəmə Hakimləri Assosiasiyasının sədri Sayad Bəktaşi, “Azərbaycan” qəzetinin baş redaktoru Bəxtiyar Sadıqov və başqaları bu tədbirin ölkəmizdə geniş miqyasda aparılan məhkəmə-hüquq islahatının, müstəqil məhkəmə orqanlarının fəaliyyətinin ictimaiyyətə doğru-düzgün və dolğun çatdırılmasında böyük rol oynayacağını, həmçinin hüquqi mövzularda yazan KİV nümayəndələri üçün də əhəmiyyətli olacağını bildirmişlər. Hazırda Azərbaycanda mətbuat və söz azadlığı sahəsində heç bir problem olmadığı, demokratik cəmiyyətdə lazım olan bütün prinsiplər əsasında azad söz yazmaq, demək üçün dövlət tərəfindən hər bir şərait yaradıldığı vurğulanmışdır.
Lakin bütün bunlara baxmayaraq, bəziləri mətbuat orqanlarından şəxsi ambisiyaları üçün istifadə edir, reketçiliklə məşğul olur, bir çox müxalifət qəzetlərində məhkəmə sisteminə qərəzli mövqedən yanaşılır, məhkəmə prosesləri düzgün işıqlandırılmır və nəticədə, onlar məhkəməyə verilir və cərimələnirlər. Buna görə də məhkəmə və KİV nümayəndələrinin belə birgə tədbirlərinə ehtiyac çoxdur və onları tez-tez keçirmək lazımdır.
Tədbirdə “Məhkəmə hakimiyyəti və mətbuat”, “KİV nümayəndələrinin məhkəmə proseslərində iştirakının hüquqi əsasları”, “Söz azadlığı və məsuliyyət. Şərəfin, ləyaqətin və işgüzar nüfuzun məhkəmə müdafiəsi”, “Məhkəmə hakimiyyəti və məhkəmə orqanlarının fəaliyyəti barədə ictimai rəyin formalaşmasında və əhalinin hüquqi maarifləndirilməsində KİV-in rolu” mövzularında məruzələr dinlənilmiş, məhkəmələrdə keçirilmiş monitorinqin nəticələrinə dair məlumat diqqətə çatdırılmışdır.
Sonda KİV nümayəndələrinin sualları cavablandırılmışdır.
