MƏKKƏ HƏCC ZİYARƏTİNƏ HAZIRDIR
Şeyxül-Əzhər Məhəmməd Səid Tantavi bildirmişdir ki, Krallığın qayğısı sayəsində zəvvarlar Həcc ziyarətinin bütün ayinlərini yüksək səviyyədə yerinə yetirə biləcəklər. Krallıq müqəddəs yerlərdə əlverişli şərait yaratmaq üçün milyonlarla rial xərcləmişdir. Misirin vəqflər naziri Mahmud Həmdi Zəqzuk da oxşar bəyanat vermişdir. O, Səudiyyə Ərəbistanı Krallığının müqəddəs yerləri müasirləşdirmək və zəvvarların hamısı üçün əlverişli şərait yaratmaq istiqamətində həyata keçirdiyi layihələri yüksək qiymətləndirmişdir.
Məkkənin meri doktor Xalid Həmzə Nəhhas bildirmişdir ki, təxminən 23 100 fəhlə zəvvarlara çoxsaylı xidmət göstərəcəkdir. Təmizliyə riayət etmək üçün müqəddəs Mina, Müzdəlifə və Ərəfat vadilərində xüsusi tədbirlər görülmüşdür. 6006 nəfərdən ibarət qrup 900 elektrik kompressoru və təxminən 13 min 950 ton zibil tutumuna malik zibil tankeri vasitəsilə dekabrın 28-dən yanvarın 15-dək Mina vadisində gecə-gündüz işləyəcəkdir.
Həcc ziyarətinin ən mühüm ayinlərindən biri qurban kəsməkdir. Yerli hakimiyyət orqanları buraya sağlam heyvanlar gətirilməsinin qayğısına qalmışlar. Bu məqsədlə Müqəddəs yerlərin ətrafında çoxsaylı sanitar məntəqələri yerləşdirilmişdir. Burada təxminən 900 min davar, 15 min qaramal və dəvə yerləşdirilə biləcək xüsusi tövlələr tikilmişdir. Heyvanlar kəsildikdən sonra baytarlar əti bir daha yoxlayacaqlar.
Nəqliyyatın hərəkətini nizamlamaq üçün çoxlu tunel tikilmişdir ki, bunların da 36-sı Məkkədədir.
