Meksika ötən il 321 min hektar meşə sahəsi itirib
Lissabon, 19 iyun, AZƏRTAC
Meşələrin qırılması Meksika ərazisinin yaralı yeridir.
AZƏRTAC xəbər verir ki, Meksika ötən il 321 min hektar meşə sahəsi itirib. Meksika ərazisinin meşəsizləşməsi meşələrin qeyri-qanuni istismarı, mütəşəkkil cinayətkarlıq, maldarlıq, monokultur və turizm üçün sahələrin genişləndirilməsi və meşə yanğınları səbəbindən baş verir. Son 20 ildə qırılan meşələrin sahəsi təxminən dörd milyon hektar təşkil edir ki, bu da Portuqaliyanın ərazisinə bərabərdir.
Bu məlumatlar dünya üzrə meşələrin vəziyyətinə nəzarət edən və Meksika ekoloji təşkilatları ilə əməkdaşlıq çərçivəsində bu dağıntıların ekoloji nəticələri barədə xəbərdarlıq edən “Global Forest Watch” (Ümumdünya Meşə Nəzarəti) platformasından götürülüb.
Ən çox zərər çəkmiş ərazilər sırasına Meksikanın cənub-şərqində geniş tropik meşə rayonlarına malik olan ən zəngin ərazilər - Yukatan, Kampeçe, Kintana-Roo və Tabasko daxildir. Bu bölgədə 81 min hektardan çox meşə sahəsi məhv edilib. Bu ərazilərin meşəsizləşməsində əsas səbəblər kimi turizm sənayesinin inkişafı, o cümlədən, ölkənin əsas görməli yerlərini birləşdirəcək “Maya Qatarları” dəmir yolu xəttinin inşa edilməsi göstərilir. Hökumət ümid edir ki, bu meqalayihənin tikintisi başa çatdıqdan sonra regiona əlavə olaraq üç milyondan dörd milyonadək turist gələcək.
Meksikanın “Reforestemos” qeyri-hökumət təşkilatının baş direktoru Ernesto Herrerin sözlərinə görə, meşələrin qırılması hallarının 95 faizi qanunsuz olaraq, hakimiyyət orqanlarının icazəsi olmadan həyata keçirilir.
Nigar Cəfərli
AZƏRTAC-ın xüsusi müxbiri
Lissabon
Bölmənin digər xəbərləri
