“Məktəb bufetlərində yararlılıq müddəti bitmiş məhsullar aşkarlanıb” – AQTA rəsmisi
Bakı, 17 iyul, AZƏRTAC
Cari ilin ilk altı ayı ərzində ölkə üzrə 390 ümumi təhsil müəssisəsində qida təhlükəsizliyi ilə bağlı monitorinqlər aparılıb və 263 məktəbdə normativ tələblərin pozulması halları müəyyən edilib.
Bu barədə Azərbaycan Qida Təhlükəsizliyi Agentliyinin şöbə müdiri Validə Sadıxova AZƏRTAC-a açıqlamasında məlumat verib.
Onun sözlərinə görə, monitorinqlər zamanı məktəb bufetlərində yararlılıq müddəti bitmiş və ya satışı qadağan edilən məhsullar aşkarlanaraq dövriyyədən çıxarılıb. “İki məktəb bufetinin fəaliyyəti isə aşkar edilmiş ciddi nöqsanlarla əlaqədar məhdudlaşdırılıb”, – deyə V.Sadıxova bildirib.
Şöbə müdiri ərzaq bazarlarında aparılan sağlamlaşdırma tədbirlərinə də toxunub. Qeyd edib ki, hazırda ölkə ərazisində 79 ərzaq bazarı fəaliyyət göstərir və hesabat dövründə onların 19-da planlı yoxlamalar həyata keçirilib: “İndiyədək 17 ərzaq bazarında sağlamlaşdırma işləri tam başa çatdırılıb. Otuz bazarda aşkar olunmuş nöqsanlar qismən aradan qaldırılıb. Digər bazarlara isə nöqsanların tam aradan qaldırılması istiqamətində zəruri tapşırıq və tövsiyələr verilib”.
Müxbir - Şəlalə Camal
Bölmənin digər xəbərləri
