MƏN AVROPA ÇEMPİONATININ HƏR İL AZƏRBAYCANDA KEÇİRİLMƏSİNİ İSTƏRDİM
Bu sözləri Avropa Gimnastika İttifaqının prezidenti Dimitrios Dimitropoulos AZƏRTAC-a məxsusi müsahibəsində demişdir.
Bədii gimnastika üzrə Bakıda keçirilən qitə çempionatının təşkilatçılıq səviyyəsinə heyran qaldığını bildirən cənab Dimitropoulos Azərbaycanın bütün Avropa ölkələrinə nümunə ola biləcəyini vurğulamışdır.
Avropa Gimnastika İttifaqının prezidenti demişdir: Mən heyranam! Avropa çempionatları tarixində ilk dəfə olaraq ölkə Prezidenti yarışlara təşrif buyurur. Bu cür tədbirlərin dövlət səviyyəsində dəstəklənməsi isə çox vacibdir. Mən Prezident İlham Əliyevə yarışa göstərdiyi böyük dəstəyə görə minnətdarlığımı bildirirəm. Əgər növbəti Avropa çempionatını harada keçirmək istədiyimizi soruşsalar, mən səmimi qəlbdən bunun yenidən Azərbaycanda təşkil olunmasını istərdim.
Bakıya ilk dəfə 2005-ci ildə dünya çempionatı zamanı gəldiyini söyləyən D.Dimitropoulos, iki il ərzində paytaxtımızın müqayisə olunmaz dərəcədə dəyişdiyini vurğulayaraq, bu inkişafın yalnız xoş sözlərə layiq olduğunu söyləmişdir.
Gələcəkdə Azərbaycanda Avropa çempionatlarının və müxtəlif beynəlxalq yarışların keçirilməsinin real olduğunu söyləyən UEG prezidenti, bunu həyata keçirmək üçün artıq indidən ölkə rəhbərliyi ilə danışıqlar aparıldığını bilidirmişdir.
Bölmənin digər xəbərləri
