Mərkəzi Elmi Kitabxananın Elmi-Metodiki Şurasının iclası keçirilib
Bakı, 6 fevral, AZƏRTAC
AMEA-nın Mərkəzi Elmi Kitabxanasının Elmi-Metodiki Şurasının iclası keçirilib.
Kitabxanadan AZƏRTAC-a bildirilib ki, iclasda Şuranın sədri MEK-in direktoru Hüseyn Hüseynov aparılan islahatlardan söz açıb. Direktor kitabxananın texniki bazasının təkmilləşdirilməsi nəticəsində rəqəmsallaşan nəşrlərin sayının sürətlə artdığını, bununla yanaşı, MEK-in geniş tammətnli bazasının olduğunu bildirib. O, həmçinin ötən ildən etibarən həyata keçirilən “MEK könüllüləri” hərəkatını kitabxana tarixində mühüm addım kimi qiymətləndirib. Bundan əlavə, hər ayın ilk iki iş günü keçirilən “Açıq qapı” günləri və sənəd sifarişinin vaxtının uzadılmasının kitabsevərlər üçün gözəl fürsət olduğunu bildirib.
Daha sonra kitabxana rəhbəri Mərkəzi Elmi Kitabxananın 100 illik yubileyinin keçirilməsi haqqında AMEA Rəyasət Heyətinin qərarını xatırladıb və bununla əlaqədar təsdiq olunan tədbirlər planını diqqətə çatdırıb.
Gündəlikdə duran cari məsələlər qismində MEK-in Elmi-Metodiki Şurasının Əsasnaməsinin hazırlanaraq şura üzvlərinə təqdim edilməsi ilə bağlı müvafiq göstərişlər də verilib.
MEK-in İnnovativ layihələr və metodiki təminat şöbəsinin əməkdaşı Şəfəq Əliyeva şöbənin ərsəyə gətirdiyi “Yaşıl kitabxanalar” kitabı haqqında geniş məlumat verib. O, işğaldan azad olunmuş ərazilərdə və Azərbaycanın digər bölgələrində də “Yaşıl kitabxana”ların yaradılmasının perspektivlərinə toxunaraq bunun üçün yetərincə şəraitin olduğunu vurğulayıb.
Bölmənin digər xəbərləri
