MƏRKƏZİ SEÇKİ KOMİSSİYASI TƏLİM MƏŞĞƏLƏLƏRİNƏ BAŞLAYIR
AZƏRTAC xəbər verir ki, Mərkəzi Seçki Komissiyası (MSK) aşağı seçki komissiyalarının maarifləndirilməsi məqsədi ilə bir sıra layihələr həyata keçirir. Bunlardan biri də məntəqə seçki komissiyaları üçün təlim məşğələlərinin təşkilidir.
MSK-nın mətbuat xidmətindən bildirmişlər ki, 2003-cü ildən keçirilən təlim məşğələləri bu il yeni formatda təşkil ediləcəkdir. MSK-nın Avropa Şurasının Venesiya Komissiyası ilə birgə gerçəkləşdirdiyi layihə çərçivəsində hər dairə seçki komissiyasından (DSK) 2 nəfər olmaqla təlim keçənlər hazırlanmışdı. MSK-nın təlim məşğələləri qrupu və Venesiya Komissiyasının ekspertləri DSK-lar tərəfindən tövsiyə olunmuş 250 mütəxəssisə 4 gün ərzində seçkilər və təqdimat bacarıqları ilə bağlı müxtəlif mövzularda təlimlər keçmişlər.
Avqustun 18-dən isə məntəqə seçki komissiyalarının üzvləri üçün təlim məşğələləri keçiriləcəkdir. Bakı və Sumqayıtda isə məşğələlər avqustun 22-dən başlanacaqdır. Məşğələlər zamanı məntəqə seçki komissiyalarının üzvlərinə əyani vəsaitlər - seçki günü üçün yaddaş, protokol nümunələri və s. təqdim olunacaqdır. Məntəqə seçki komissiyalarının 30 000-dən artıq üzvünü əhatə edəcək məşğələlərin birinci mərhələsinə avqustun sonlarında yekun vurulacaqdır.
Bölmənin digər xəbərləri
