Mərkəzi Seçki Komissiyasının sədri Rumıniyada 23-cü illik konfransda iştirak edir
Buxarest, 5 sentyabr (AZƏRTAC). Azərbaycan Respublikası Mərkəzi Seçki Komissiyasının (MSK) sədri Məzahir Pənahov Avropa Seçki Rəsmiləri Assosiasiyasının Rumıniyada keçirilən 23-cü illik konfransında iştirak edir.Avropa Seçki Rəsmiləri Assosiasiyası və Rumıniya Mərkəzi Seçki Komissiyası tərəfindən birgə təşkil edilən tədbirdə Avropa ölkələrinin seçki idarəetmə qurumlarının rəhbərləri iştirak edirlər.
Sentyabrın 4-də başlayan konfransda əsas müzakirə mövzuları ümumi seçkilərin keçirilməsi və qadınların seçkilərdə iştirakı məsələləridir.
Məzahir Pənahov tədbirdə çıxış edərək Azərbaycanın seçki sistemi barədə ətraflı məlumat verib.
Səfər çərçivəsində M.Pənahov, həmçinin müxtəlif ölkələrin ali seçki orqanlarının, beynəlxalq təşkilatların rəhbərləri və digər rəsmi şəxslərlə, o cümlədən Rumıniya Mərkəzi Seçki Komissiyasının sədri xanım Ana Maria Patru, Avropa Seçki Rəsmiləri Assosiasiyasının baş katibi Jolt Solnoki ilə görüşüb.
Görüşlərdə qarşılıqlı maraq doğuran bir çox məsələlər müzakirə edilib, əməkdaşlığın perspektivləri barədə fikir mübadiləsi aparılıb.
Konfrans sentyabrın 6-da başa çatacaq.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
