- Hörmətli cənab Prezident!

Hörmətli xanımlar və cənablar!

Əziz qonaqlar!

İyulun 22-si milli mətbuat günüdür, bütün Azərbaycan xalqının bayramıdır. Hər bir xalqın milli intibahı, ictimai təfəkkürün inkişafı onun milli mətbuatı ilə üzvi surətdə bağlıdır. 130 yaşlı “Əkinçi” də Azərbaycanın ictimai fikir tarixində belə müstəsna rol oynamışdır. Qəzetin naşiri, redaktoru, müxbiri və korrektoru vəzifələrini uzun müddət icra edən Həsən bəy Zərdabi haqlı olaraq, Azərbaycan mətbuatının banisi hesab edilir.

“Əkinçi” aydın proqramla, məqsədlə meydana atılmışdı. Əsrlər boyu görülə bilməyən bir işi cəmi iki ilə həyata keçirdi, xalqın qeyrətli oğullarını başına toplayaraq misilsiz bir məktəb yaratdı. “Əkinçi”nin səpdiyi ziya, maarifçilik toxumu hələ ondan çox sonralar da öz bəhrəsini verdi. Onun ideyaları “Şərqi-Rus”, “Həyat”, “Kaspi” qəzetləri, demokratik mətbuatın öncülləri olan “Molla Nəsrəddin”, “Zənbur” jurnalları və digər nəşrlər tərəfindən daha da inkişaf etdirilərək, yüksək mərhələyə qaldırıldı. Maarifləşmə, məfkurə saflığı, ümummilli dəyərlərin təbliği, onların qiymətləndirilməsi, yazılı dilin şifahi dilə yaxınlığı, faktlara və hadisələrə obyektiv baxış məhz “Əkinçi”dən gələn prinsiplər idi. Bütün bunlar Azərbaycan ilk dəfə müstəqilliyini əldə edərkən baza rolunu oynadı.

1918-1920-ci illərdə Xalq Cümhuriyyəti bu ideyalara hörmət əlaməti olaraq, müstəqil mətbuatın inkişafı üçün lazım olan bütün şəraiti yaratdı. Buna bariz nümunə kimi “Azərbaycan” qəzetini göstərmək olar. Demokratik dəyərlərə söykənən bu qəzetin ictimai fikir tariximizdə oynadığı rolun nəticəsidir ki, Azərbaycan müstəqilliyinə ikinci dəfə qovuşarkən fəaliyyətini bərpa edən ilk qəzetlərdən biri məhz bu qəzet oldu.

Totalitar rejimin nə olduğu xalqımıza artıq 70 illik sovet dövrünün təcrübəsindən yaxşı məlumdur. Bu, doğrudan da hər bir ideyanı, azad sözü çərçivəyə salan bir sistem idi. Mətbuat üzərində dövlət inhisarı, hətta mövzuları, ən kiçik xəbərləri partiyalılığa uyğunlaşdırmaq münasibəti o dövrün əsas xüsusiyyətləri idi. Ancaq biz bu dövrü yalnız mənfiliklərlə yadda saxlaya bilmərik.

Keçən əsrin 80-ci illərinin sonunu, azadlıq hərəkatını yadımıza salaq. Həmin müddətdə o hadisələrin önündə sovet senzurasından qorxmayaraq, öz fikirlərini xalqa çatdırmağa cəhd edən insanlar dayanmışdılar. Azərbaycanın müstəqilliyi, ərazi bütövlüyü uğrunda canlarını fəda edən Çingiz Mustafayev, Alı Mustafayev, Salatın Əsgərova, mətbuatın azadlıq rəmzi hesab edilən Nəcəf Nəcəfov və başqaları məhz həmin dövrün yetirmələri idi. Biz həmin insanların ruhunu həmişə hörmətlə yad edirik.

Hörmətli xanımlar və cənablar!

Azərbaycan yenidən müstəqilliyini əldə etdikdən sonra ölkəmizdə söz və mətbuat azadlığı ilə bağlı ciddi işlər görülmüşdür və görülməkdədir. Təsəvvür edin, hər vətəndaş az bir vaxtda özü üçün kütləvi informasiya vasitəsi təsis edə bilər və öz fikrini, məramını asanlıqla çatdırmaq imkanına malikdir. Azərbaycan mətbuatının hüquqi bazası gündən-günə genişlənir, təkmilləşir. Biz əminik ki, tezliklə informasiya azadlığı haqqında qanun qəbul olunacaq, informasiya ilə bağlı qanunvericilikdə düzəlişlər ediləcəkdir.

Azərbaycan mətbuatına dövlət qayğısının artırılması ilə bağlı iki mühüm sənəd qəbul edilibdir. Mətbuat üzərindən senzura, əlavə dəyər vergisi götürülmüş, ölkəmizə qəzet kağızının gətirilməsi ilə bağlı gömrük rüsumu sıfıra endirilibdir. Bütün bunlar 2002-ci ildə “Jurnalistlərin dostu” adına layiq görülən mərhum Prezidentimiz Heydər Əliyevin Azərbaycan mətbuatına qayğısı kimi qiymətləndirilir. Allah ona rəhmət eləsin!

Hörmətli xanımlar və cənablar!

Bu gün Azərbaycan mətbuatı problemlərdən də xali deyildir. Deyərdim ki, mətbuatımızın əsas problemi onun iqtisadi cəhətdən özünü maliyyələşdirə bilməməsidir. Belə olduğu halda, mətbuat vasitələri ya məhv olur, yaxud da başqa yollara əl atır. Nəticə göz qabağındadır. Azərbaycan mətbuatı siyasiləşir. Siyasiləşdikcə, müstəqilliyini itirir. Fərdi, qrup maraqları ümumi maraqları üstələyir. Nəticədə insanların şərəf və ləyaqəti alçaldılır, onların haqqında həqiqətə uyuşmayan materiallar baş alıb gedir. Mənə elə gəlir ki, hazırda mətbuatımızın inkişafını sürətləndirmək üçün aşağıdakı işləri görmək vacib şərtlərdəndir.

Müasir mətbuat öz problemlərinə kompleks yanaşmağa üstünlük verir. Mətbuatın inkişafı üçün mühüm dövlət sənədinin hazırlanması vacibdir. Həmin sənəddə bütün mətbuat vasitələrinin, əsasən də, rəsmi kütləvi informasiya vasitələrinin tezliklə özəlləşdirilməsi, müstəqilləşdirilməsi, mətbuatın maddi-texniki bazasının gücləndirilməsi, onlara həqiqətən də uzunmüddətli kreditlərin verilməsi, televiziyalara lisenziyaların verilməsinə başlanması və jurnalistlərin peşəkarlığının artırılması həmin proqramın əsas hissələrini təşkil etməlidir.

Bu gün burada Azərbaycan mətbuatının yubileyini keçirdiyimiz bir vaxtda təbii ki, Elmar Hüseynovla bağlı ağrı-acılar bizi tərk etməyibdir. Bu, təbiidir. Bu ağrı-acı bizi o zaman tərk edəcək ki, günahkarlar tapılıb haqlı cəzalarını alacaqlar. Biz, Azərbaycan jurnalistləri buna əminik.

Cənab Prezident, Siz Azərbaycan milli mətbuatının 130 illiyi ilə bağlı Sərəncam imzaladınız. Həmin Sərəncamın mətbuatımıza müsbət təsiri açıq-aşkar sezilməkdədir. Biz əminik ki, Siz bundan sonra da mətbuatla bağlı digər sənədlər qəbul edib, mətbuatın müstəqilləşməsi üçün əlinizdən gələni edəcəksiniz.

Çıxışımın sonunda mən milli mətbuat günü münasibətilə hamınızı səmimi qəlbdən təbrik edirəm. Sizə həyatın ən gözəl neməti olan cansağlığı, uğurlar arzulayıram. Sağ olun.

X X X

Azərbaycan Prezidenti İlham Əliyev mərasimdə nitq söylədi. (Dövlətimizin başçısının nitqi qəzetin bugünkü nömrəsində dərc olunur).

X X X

Sonra Prezidentin İcra Aparatının ictimai-siyasi şöbəsinin müdiri Əli Həsənov Azərbaycan Prezidenti İlham Əliyevin bir sıra kütləvi informasiya vasitələrinin və onların əməkdaşlarının mükafatlandırılması ilə bağlı imzaladığı sərəncamları oxudu.

X X X

Azərbaycan Prezidenti İlham Əliyev jurnalistlərlə səmimi görüşdü, onların bayramlarını təbrik etdi, problemləri və qayğıları ilə maraqlandı.

Təltif olunan, mükafat alan kütləvi informasiya vasitələrinin nümayəndələri, jurnalistlər milli mətbuatımızın inkişafına göstərilən dövlət qayğısına görə respublikamızın rəhbərinə dərin təşəkkür və minnətdarlıqlarını bildirdilər. Xalqımızın ümummilli lideri Heydər Əliyevin Azərbaycan mətbuatının inkişafındakı xidmətlərini xatırlatdılar, ulu öndərin rəhbərliyi dövründə mətbu orqanlara yetirilən diqqətin unudulmadığını, bu siyasətin uğurla davam etdirildiyini vurğuladılar, bəzi problemlərdən söhbət açdılar, dövlətimizin başçısına xarici ölkələrdə nəşr olunan qəzet və jurnalların nüsxələrini təqdim etdilər.

Prezident İlham Əliyev mətbuatın, o cümlədən rayon qəzetlərinin inkişafı istiqamətində, onların problemlərinin həlli ilə bağlı bundan sonra da mühüm işlər görüləcəyini diqqətə çatdırdı. O dedi ki, hər şeyi etmək mümkündür. Sadəcə olaraq, gərək yerlərdə insanlar canla-başla işləsinlər. Biz də öz tərəfimizdən kömək edəcəyik. Sizin hamınızı bayram münasibətilə bir daha ürəkdən təbrik edirəm.

Prezident İlham Əliyev mərasimin sonunda jurnalistlərlə xatirə şəkli çəkdirdi.