MƏTBUAT.COM – AZƏRBAYCANIN MƏTBUAT PORTALI
Qrupun baş direktoru Anar Novruzov əvvəlcə şirkət barədə məlumat verərək demişdir ki, ilkin mərhələdə Azərbaycan dilində İnterneti inkişaf etdirməyi qarşısına məqsəd qoyan Azer.Net sonradan fəaliyyətini bütün informasiya-kommunikasiya texnologiyaları sahəsində genişləndirə bilmişdir. İnternet istifadəçilərinə dünya standartlarına uyğun mətbuat portalında işləmək imkanı yaratmaqla bu sahədə də birinciliyi qorumaqda olan şirkətimiz əldə etdiyi nailiyyətlərə görə, Həsən bəy Zərdabi və “Humay” milli mükafatlarına layiq görülmüşdür.
Təqdim olunan layihənin əhəmiyyətindən danışan natiq demişdir ki, bu saytı tərtib etməkdən məqsəd nüfuzlu KİV-ləri geniş İnternet auditoriyasında birləşdirməkdir. Azer.Net şirkətlər qrupu Azərbaycan dilində oxumağı bilən İnternet istifadəçilərinə dünya standartlarına uyğun mətbuat portalında işləmək imkanı yaratmaqla bu sahədəki fəaliyyətini genişləndirməkdədir.
W W W. Mətbuat.Com – Azərbaycanın mətbuat portalıdır. Bu sayt layihə iştirakçılarının xəbərlər bazası əsasında təşkil olunmuş hər saat yeniləşdirilən bir elektron xidmətdir. Qafqaz və Orta Asiya ölkələrində oxşarı olmayan bu sayt istifadəçilərə çox rahat bir üsulla, eyni vaxtda bütün qəzetlərdə (agentliklərdə) olan əsas məlumatlar və həmçinin bölmələrə ayrılmış xəbərlərlə tanış olmağa imkan verir.
