MİLLİ BANKDA KİV NÜMAYƏNDƏLƏRİ ÜÇÜN SEMİNAR KEÇİRİLMİŞDİR
Tədbirdə bankın Pul siyasəti departamentinin direktoru Xaqani Abdullayevin “İnflyasiyanın hesablanması metodları və AMB-nin təcrübəsi”, Tədqiqatlar və statistika departamentinin direktoru Emin Hüseynovun “Real effektiv məzənnə və beynəlxalq rəqabət qabiliyyəti” mövzularıında məruzələri dinlənilmişdir.
X.Abdullayev iqtisadi kateqoriya kimi inflyasiyanın mahiyyətini açıqlamış, onun əsas göstəricisi olan istehlak qiymətləri indeksinin hesablanma metodologiyasını sadə misallar əsasinda təsvir etmişdir. Məruzə pul siyasətinin əsas hədəfi kimi baza inflyasiyadan istifadə olunmasının əhəmiyyəti və zəruriliyi məsələlərinin müzakirəsi ilə yekunlaşmışdır.
E.Hüseynov, beynəlxalq rəqabət qabiliyyətinin göstəricisi kimi real effektiv məzənnə indeksi barədə məlumat vermiş, bir əmtəə və iki ölkə timsalında rəqabət qabiliyyəti konsepsiyasını izah etmişdir. O, real effektiv məzənnə indeksinin tərkib hissələri kimi, daxili inflyasiya səviyyələri arasındakı fərqi və nominal məzənnənin dəyişməsinin ölkə iqtisadiyyatının rəqabət qabiliyyətinə təsirinin mahiyyətini də açıqlamışdır.
Sonda Milli Bankın baş direktoru Şahmar Mövsümov jurnalistlərin çoxsaylı suallarını cavablandırmışdır.
