MİLLİ MƏCLİS BİR SIRA SAZİŞ VƏ MÜQAVİLƏLƏRİ TƏSDİQ ETMİŞDİR
Milli Məclisin sədri Oqtay Əsədov, əvvəlcə, öz adından və deputatlar adından Azərbaycan Prezidenti İlham Əliyevi doğum günü münasibətilə təbrik etmiş, Azərbaycan xalqının rifahı naminə fəaliyyətində dövlətimizin başçısına uğurlar arzulamışdır.
Sonra gündəlikdəki məsələlərin müzakirəsinə başlanmışdır. Milli Məclis Cəfər Vəliyevin öz ərizəsi əsasında Azərbaycan Respublikası İqtisad Məhkəməsinin hakimi səlahiyyətlərinə, həmçinin Südabə Həsənovanın öz ərizəsi əsasında Ali Məhkəmənin hakimi səlahiyyətlərinə xitam vermiş və onu Konstitusiya Məhkəməsinin hakimi vəzifəsinə təyin etməsi haqqında qərarlar qəbul etmişdir.
Südabə Həsənova parlamentdə çıxış edərək üçüncü çağırış Milli Məclisin deputatlarını təbrik etmiş, ona göstərilən etimada görə, dövlətimizin başçısına, deputatlara minnətdarlığını bildirmiş və Azərbaycan xalqına, Vətənə sədaqətlə xidmət edəcəyinə and içmişdir.
Daha sonra Milli Məclisin hüquq siyasəti və dövlət quruculuğu məsələləri daimi komissiyasının sədri Əli Hüseynov digər məsələ - “Azərbaycan Respublikası Hökuməti ilə Türkiyə Respublikası Hökuməti arasında xəritəçilik sahəsində təhsil, texniki və elmi əməkdaşlıq haqqında Saziş”in layihəsi barədə məlumat vermişdir. O qeyd etmişdir ki, bu sənəd ölkələrimiz arasında xəritəçilik sahəsində elmi, texniki və digər əlaqələrin inkişafına xidmət edəcəkdir. Layihə səsə qoyularaq təsdiqlənmişdir.
Beynəlxalq münasibətlər və parlamentlərarası əlaqələr daimi komissiyası sədrinin müavini Gültəkin Hacıyeva Azərbaycan Respublikası Prezidentinin və Bolqarıstan Respublikası Prezidentinin Birgə Bəyannaməsini müzakirəyə təqdim etmişdir. Deputatlar sənədi Azərbaycan Prezidenti İlham Əliyevin həyata keçirdiyi xarici siyasətin uğurlu nəticəsi kimi qiymətləndirmiş və onun xalqımızın milli maraqlarına xidmət etdiyini vurğulamışlar.
Milli Məclis Azərbaycan və Bolqarıstan hökumətləri arasında sadələşdirilmiş viza rejiminin tətbiqinə, Avropa və Avratlantik inteqrasiya sahəsində əməkdaşlığa dair digər sənədləri də təsdiqləmiş, “dövlət qulluğu haqqında”, “Dövlət sirri haqqında”, “Hemofiliya və talassemiya irsi qan xəstəliklərinə düçar olmuş şəxslərə dövlət qulluğu haqqında”, “Azərbaycan Respublikasının Əmək Məcəlləsinə dəyişiklik edilməsi barədə” qanunların tətbiqi ilə əlaqədar bəzi qanunlara əlavələr və düzəlişlər etmişdir. İclasda, həmçinin, Qəbələ rayonunun inzibati ərazi bölgüsündə qismən dəyişikliklər edilmişdir.
Günün ikinci yarısında Milli Məclis tərəfindən 2005-ci il sentyabrın 30-da qəbul olunmuş “Azərbaycan Respublikası Bələdiyyələr İttifaqının Nizamnaməsinin təsdiq edilməsi barədə” Qanuna Azərbaycan Respublikası Prezidentinin etirazları haqqında məsələyə baxılmışdır. Prezidentin İcra Aparatının qanunvericilik və hüquq ekspertizası məsələləri şöbəsi müdirinin müavini Niyazi Səfərov məsələ ilə əlaqədar məlumat vermişdir. O bildirmişdir ki, layihədəki bir sıra müddəalar və ümumiyyətlə, hər hansı hüquqi şəxsin, konkret halda, hazırda mövcud olmayan İttifaqın Nizamnaməsinin qanunla təsdiq edilməsi konseptual baxımdan mülki hüququn mahiyyətinə uyğun deyildir və bununla əlaqədar, Azərbaycan Respublikası Mülki Məcəlləsinin müvafiq maddələri ilə uzlaşmır.
Layihə müzakirədən çıxarılmış və gələcəkdə zərurət yaranarsa, yenidən mükəmməl işlənməli olması qeyd edilmişdir.
Milli Məclisin sədri qanun layihələrinin mükəmməl, konseptual baxımdan mülki hüququn mahiyyətinə uyğun hazırlanması barədə daimi komissiya sədrlərinə tapşırıq və tövsiyələr vermişdir.
Bölmənin digər xəbərləri
