MİLLİ MƏCLİS “DÖVLƏT SİRRİ HAQQINDA” QANUNLAYİHƏSİNİ ÜÇÜNCÜ OXUNUŞDA QƏBUL ETMİŞDİR
AZƏRTAC-ın müxbiri xəbər verir ki, cari məsələlərin müzakirəsi zamanı deputatlar NATO-nun Bakıda keçiriləcək tədbirində erməni zabitlərinin iştirakına etrazlarını ifadə etmiş və Milli Məclisin məsələyə münasibət bildirməsini tələb etmişlər.
Milli Məclisin sədri Murtuz Ələsgərov demişdir ki, Azərbaycan dövləti NATO ilə bir sıra proqramlar çərçivəsində əməkdaşlıq edir. Bu ilin sentyabrında Bakıda keçirilməsi nəzərdə tutulan tədbirin təşkilatçısı da NATO-dur və rəsmi Bakı bu məsələyə müdaxilə edə bilməz. Murtuz Ələsgərov məsələ ilə bağlı dövlətimizin başçısı və digər əlaqədar təşkilatların rəhbərləri ilə söhbət edəcəyini, deputatların narazılıqlarını onlara çatdıracağını bildirmişdir.
Sonra “Mülki dövriyyənin müəyyən iştirakçılarına mənsub ola bilən və dövriyyədə olmasına xüsusi icazə əsasında yol verilən (mülki dövriyyəsi məhdudlaşdırılmış) əşyaların siyahısı haqqında” Qanunun tətbiqi ilə əlaqədar bəzi qanunvericilik aktlarına dəyişikliklər və əlavələr edilmişdir.
Daha sonra “Dövlət sirri haqqında” qanun layihəsi üçüncü, “Azərbaycan xalça sənətinin qorunması və inkişaf etdirilməsi haqqında” qanun layihəsi isə ikinci oxunuşda müzakirə edilərək qəbul olunmuşdur.
Bölmənin digər xəbərləri
