MİLLİ MƏCLİSİN DEPUTATLARI ABŞ-DA SƏFƏRDƏDİRLƏR
AZƏRTAC xəbər verir ki, ABŞ-ın Kaliforniya ştatı Senatının dəvəti ilə bu ştatda səfərdə olan Milli Məclisin deputatları Qənirə Paşayeva, Gülər Əhmədova, Fuad Muradov və Asim Mollazadə avqustun 12-də San-Fransisko Şəhər şurasının sədri Aaron Peskin və şuranın üzvləri ilə görüşmüşlər.
Azərbaycanın Los-Ancelesdəki baş konsulluğundan AZƏRTAC-a bildirmişlər ki, Şəhər şurasının xüsusi iclasında Aaron Peskin nümayəndə heyətimizi salamlamış və onlara sertifikat təqdim etmişdir.
Nümayəndə heyətinin üzvü Asim Mollazadə Azərbaycan ilə Kaliforniya ştatı arasındakı ikitərəfli münasibətlərin inkişafının əhəmiyyətini vurğulamış və San-Fransiskonun bu əməkdaşlıqda özünəməxsus yeri olduğunu qeyd etmişdir. O, ABŞ-la Azərbaycan arasındakı strateji əməkdaşlıq münasibətləri haqqında da məlumat vermişdir.
Həmin gün təşkil edilmiş “Postsovet Azərbaycan və müstəqillikdən sonrakı inkişaf” mövzusunda konfransda ölkəmizdə tolerantlıq, gender bərabərliyi və dünyəvi dövlətçilik ənənələrindən, bu sahələrdə son illərdə əldə olunmuş nailiyyətlərdən danışılmışdır.
######
Bölmənin digər xəbərləri
