Milli Meşə Proqramı və onun Fəaliyyət Planının ilkin layihəsinin təqdimatı olub YENİLƏNİB
(YENİLƏNİB)
Bakı, 14 iyun, AZƏRTAC
İyunun 14-də Azərbaycan Respublikasında meşələrin mühafizəsi və dayanıqlı inkişafına dair Milli Meşə Proqramının və onun Fəaliyyət Planının ilkin layihəsinin təqdimatı keçirilib. Milli Meşə Proqramı “Milli Meşə Proqramının yenilənməsi və meşə idarəetmə sisteminin müasirləşdirilməsi üçün texniki dəstək” layihəsi çərçivəsində BMT-nin Ərzaq və Kənd Təsərrüfatı Təşkilatının (FAO) Azərbaycandakı nümayəndəliyinin texniki dəstəyi ilə Ekologiya və Təbii Sərvətlər Nazirliyi tərəfindən hazırlanıb.
AZƏRTAC xəbər verir ki, Ekologiya və Təbii Sərvətlər naziri Muxtar Babayev tədbirin məqsədinin beynəlxalq ekspertlərin dəstəyi ilə hazırlanan Milli Meşə Proqramının və onun həyata keçirilməsi üçün Fəaliyyət Planının ilkin layihəsinin müzakirə edilməsi, bu istiqamətdə mövcud beynəlxalq təcrübələrin öyrənilməsi, eləcə də proqramın prioritet istiqamətləri üzrə bütün maraqlı tərəfdaşlarla fikir mübadiləsinin aparılması olduğunu qeyd edib. Nazir deyib: “Azmeşəli ölkə kimi meşələrin artırılması və mühafizəsi prioritet istiqamətlərimizdən biridir. Bu baxımdan ölkəmizdə meşələrin bərpasına, yeni meşə zolaqlarının salınmasına çox böyük önəm verilir. Meşə fondunun əkinəyararlı açıq sahələrində aqrobağlar salınır. Həmçinin tezböyüyən ağac cinslərindən ibarət plantasiyalar yaradılır. Belə meşə zolaqlarının salınması qida və ağac emalı sənayesinin inkişafı üçün də əhəmiyyətlidir. Milli Meşə Proqramının hazırlanmasının məqsədi ölkəmizdə meşələrin səmərəli idarə edilməsi sahəsində siyasi, institusional və qanunvericilik üzrə təkmilləşdirmə işlərinin aparılmasıdır. Azərbaycan Respublikasının Milli Meşəçilik Proqramı 2020-2030-cu illəri əhatə edən 10 illik müddət üçün işlənib hazırlanıb. Bu proqram respublikamızda meşəçiliyin inkişaf strategiyasını əks etdirən əsas sənəd olmalıdır”.
M.Babayev bildirib ki, sənəd layihəsində ölkənin meşə resurslarının inkişafında ictimaiyyətin və digər maraqlı tərəflərin geniş iştirakı, hazırkı meşə resurslarının mövcud vəziyyətinin ətraflı təhlili xüsusi yer tutur: “Proqramda ətraf mühitin, biomüxtəlifliyin qorunması, iqlim dəyişmələrinə adaptasiya, eləcə də kənd yerlərinin inkişafına töhfə verilməsinə xüsusi diqqət yetirilir. Həmin proqramda nəzərdə tutulan tədbirlər, ilk növbədə, dövlətin ekoloji və iqtisadi siyasətinin tərkib hissəsi olmaqla, bütün tərəflərin maraqlarına, o cümlədən yoxsulluğun azaldılması, regionların inkişafına və kənd yerlərində əhalinin məşğulluğuna, kənd təsərrüfatı sektorunun, ekoturizmin inkişafına təkan verəcək. Eyni zamanda, istər meşə fondu, istərsə də vətəndaşların fərdi və bələdiyyə mülkiyyətinə aid ərazilərində qısa dövriyyəli kommersiya meşələrinin yaradılması nəzərdə tutulur. Nəticədə, ağac sənayesində və tikinti-inşaat işlərində idxaldan asılılıq azaldılacaq. Yeni Strateji sənəd olan Milli Meşə Proqramında bir sıra əlaqədar qurumların iştirakı ilə eroziyaya qarşı mübarizə və səhralaşma prosesinin qarşısının alınması tədbirlərinin icrası, iqtisadi, sosial və ekoloji tələblərə cavab verən müasir turizm sənayesinin formalaşdırılması, bioloji müxtəlifliyin idarə edilməsi, meşə tingçiliyi və toxumçuluğunun inkişafı üzrə fəaliyyətin göstərilməsi nəzərdə tutulur.
İnanıram ki, bu gün burada ictimai dinləmə formatında təşkil olunan müzakirələr bizə meşələrimizin davamlı idarəedilməsi üçün aydın bir yol, plan işləməyə köməklik edəcək. Tədbirdən sonra təkmilləşdirilmiş proqram layihəsi hökumətə təqdim olunacaq.
Onu da bildirmək istərdim ki, FAO ilə birgə həyata keçirilən layihə çərçivəsində ölkə üzrə meşələrin inventarlaşma sisteminin qurulması, meşəçi ekspertlərin bu sahədə bilik və bacarıqlarının artırılması, müasir metodlar əsasında meşə idarəetmə planlarının hazırlanması işlərinə başlanılıb. Hazırda qeyd olunan məsələlər bizim üçün prioritet olduğundan FAO tərəfindən bu kimi dəstəyin verilməsini yüksək qiymətləndiririk.
Meşəçi mütəxəssislərin hazırlanmasında meşəçilik elminin tədrisi olduqca vacibdir. Bu gün ölkəmizdə meşə sahəsi üzrə fəaliyyət göstərən mütəxəssislər vaxtilə SSRİ-nin müxtəlif şəhərlərindəki təhsil ocaqlarından məzun olmuş şəxslərdir. Hazırda ölkəmizdə Azərbaycan Dövlət Aqrar Universiteti respublikada yeganə ali təhsil müəssisəsidir ki, yalnız orada “Meşəçilik” ixtisası üzrə mütəxəssis hazırlığı aparılır. Burada təhsil alan tələbələr nazirliyin tabeliyindəki qurumlarında iş təcrübəsi keçə, istər yerli, istərsə də beynəlxalq təlim, konfrans, seminarlarda iştirak edə biləcəklər. Seçilmiş namizədlərdən gələcəkdə nazirliyin ehtiyat kadr heyətinin formalaşdırılması nəzərdə tutulur ki, bu da gənclərin iş həyatına uğurlu bir keçid fürsəti yaradacaq. Ümid edirəm ki, aparılacaq müzakirələr meşələrin inkişafı sahəsində optimal planlaşdırmaya və bütün resurslardan səmərəli şəkildə istifadəyə imkan verəcək”.
FAO-nun Azərbaycandakı Tərəfdaşlıq və Əlaqələndirmə Ofisinin rəhbəri Mələk Çakmak, BMT-nin Avropa İqtisadi Komissiyasının və FAO-nun meşə və oduncaq bölməsinin rəis müavini Əkrəm Yazıçı Milli Meşə Proqramının meşələrin mühafizəsindəki rolundan danışıblar. Çıxış edənlər təşkilatın yaşıllıq və meşə zolaqları salan ölkələrdən öz dəstəyini əsirgəmədiyini diqqətə çatdırıblar.
Sonra Ə.Yazıçı “Azərbaycanda meşələrin mühafizəsi və dayanıqlı inkişafına dair Milli Meşə Proqramı” mövzusunda təqdimatla çıxış edib.
Tədbirdə müzakirələr aparılıb, maraqlı tərəflərin fikirləri dinlənilib.
Təqdimat mərasimində, həmçinin Azərbaycan Dövlət Aqrar Universiteti ilə Ekologiya və Təbii Sərvətlər Nazirliyi arasında gənc meşəçi kadr hazırlığını təmin etmək məqsədilə ikitərəfli Anlaşma Memorandumu imzalanıb.
Bölmənin digər xəbərləri
