Milli mətbuatın 151 illik maarifçilik ənənələri və elmin təbliği
Bakı, 20 iyul, AZƏRTAC
İyulun 22-də Azərbaycan mətbuatının yaranmasının 151 ili tamam olur. 1875-ci ildə böyük mütəfəkkir Həsən bəy Zərdabinin nəşr etdirdiyi “Əkinçi” qəzeti ilə əsası qoyulan Azərbaycan milli mətbuatı ötən dövr ərzində xalqın maariflənməsində, ictimai fikrin formalaşmasında, milli-mənəvi dəyərlərin qorunmasında və elmi biliklərin təbliğində mühüm rol oynayıb. “Əkinçi” yalnız ilk milli qəzet deyil, həmçinin elmə, təhsilə və tərəqqiyə çağırış edən, cəmiyyətin inkişafını maarifçiliyin, demokratiyanın geniş yayılmasında görən mütərəqqi ideyaların daşıyıcısı idi. Bu ənənələr sonrakı dövrlərdə Azərbaycan mətbuatının inkişafına istiqamət verib, elmi fikrin və mədəni irsin geniş ictimaiyyətə çatdırılmasında böyük əhəmiyyət kəsb edib.
Bu fikirlər AMEA Rəyasət Heyəti aparatının İctimaiyyətlə əlaqələr, mətbuat və informasiya şöbəsinin Elektron informasiya sektorunun müdiri Nərgiz Qəhrəmanovanın AZƏRTAC-a təqdim etdiyi “Milli mətbuatın 151 illik maarifçilik ənənələri və elmin təbliği” məqaləsində yer alıb.
Məqalədə qeyd olunur ki, rəqəmsal və süni intellekt texnologiyalarının sürətlə inkişaf etdiyi, informasiya axınının son dərəcə artdığı müasir dövrdə də milli mətbuat maarifçilik missiyasını uğurla davam etdirir. Xüsusilə elmi biliklərin cəmiyyətə çatdırılması, etibarlı informasiya mühitinin formalaşdırılması və milli-mədəni irsin təbliği istiqamətində jurnalistikanın, mətbuat nümayəndələrinin üzərinə mühüm vəzifələr düşür. Azərbaycan Milli Elmlər Akademiyası da bu prosesdə elmi nəticələrin ictimaiyyətə çatdırılması, elmin irsin qorunması, təbliği və populyarlaşdırılması sahəsində media ilə səmərəli əməkdaşlığa xüsusi önəm verir.
Akademiyanın çoxsaylı elmi nəşrləri, jurnalları, kitabları, monoqrafiyaları, habelə rəsmi informasiya resursları və media platformaları ölkənin elmi və intellektual potensialının tanıdılmasına və gələcək nəsillərə ötürülməsinə töhfə verir. Eyni zamanda, AMEA-da keçirilən elmi tədbirlər, konfranslar, yubiley mərasimləri və mühüm elmi nailiyyətlərin operativ şəkildə ictimaiyyətə təqdim olunması akademik mühitlə cəmiyyət arasında əlaqələrin möhkəmləndirilməsinə xidmət edir.
Bu baxımdan əlamətdar hadisələrdən biri də cari ildə AMEA-da Birinci Türkoloji Qurultayın 100 illiyi münasibətilə geniş silsilə tədbirlərin keçirilməsi olub. Bu münasibətlə Akademiya və onun elmi müəssisələrində müxtəlif tədbirlər, elmi sessiyalar, dəyirmi masalar, kitab təqdimatları və sərgilər təşkil edilib, Birinci Türkoloji Qurultayın Azərbaycan milli-mədəni fikrinin Türk dünyasına inteqrasiyası tarixindəki müstəsna rolu geniş şəkildə təhlil edilib. Yubiley çərçivəsində hazırlanan kitablar, monoqrafiyalar, məqalələr və digər elmi nəşrlər, eləcə də AMEA-nın informasiya resurslarında dərc olunan müsahibə və analitik yazılar qurultaya dair elmi irsin geniş ictimaiyyətə çatdırılmasına, onun gələcək nəsillər üçün qorunub saxlanılmasına və təbliğinə töhfə verib.
Cəmiyyətin obyektiv, dəqiq və etibarlı informasiya ilə təmin olunmasında medianın üzərinə böyük məsuliyyət düşür. AMEA da bu istiqamətdə alim və mütəxəssislərin fəaliyyətinin, elmi tədqiqat nəticələrinin geniş ictimaiyyətə təqdim olunması üçün media ilə əməkdaşlığın inkişafına xüsusi diqqət yetirir.
Qeyd etmək lazımdır ki, IV Şuşa Qlobal Media Forumu ölkəmizdə media siyasətinə verilən önəmin, mətbuat sahəsində beynəlxalq əməkdaşlığın genişləndirilməsi istiqamətində həyata keçirilən ardıcıl tədbirlərin bariz nümunəsi kimi yadda qaldı. “Sülhün təşviqində medianın missiyası: Həqiqətin bərpası və etimadın yenidən qurulması” mövzusuna həsr olunan forum dünyanın müxtəlif ölkələrindən media rəhbərlərini, jurnalistləri, ekspertləri və beynəlxalq təşkilatların nümayəndələrini bir araya gətirərək qlobal informasiya məkanında aktual məsələlərin müzakirəsi üçün mühüm platforma rolunu oynadı.
Forum çərçivəsində Azərbaycan Respublikasının Prezidenti İlham Əliyevin iştirakçılarla ənənəvi görüşü və çoxsaylı sualları açıq, səmimi və ətraflı şəkildə cavablandırması dövlətimizin başçısının media ilə dialoqa, jurnalist peşəsinə və obyektiv informasiyanın cəmiyyətdəki roluna verdiyi yüksək dəyərin daha bir ifadəsi oldu.
Azərbaycanda media sahəsində həyata keçirilən ardıcıl islahatlar, jurnalistlərin fəaliyyətinin dəstəklənməsi, peşəkar medianın inkişafı və beynəlxalq media əməkdaşlığının genişləndirilməsi istiqamətində görülən işlər milli mətbuatın müasir dövrün çağırışlarına uyğun inkişafına mühüm töhfə verir.
Əminik ki, Azərbaycan mətbuatı çoxillik zəngin ənənələrinə sadiq qalaraq bundan sonra da uğurla inkişaf edəcək, cəmiyyətin obyektiv, dolğun və etibarlı informasiya ilə təmin olunmasına, milli-mənəvi dəyərlərin, elm və təhsilin təbliğinə öz töhfəsini verəcək. Eyni zamanda, AMEA mətbuatı elmi biliklərin populyarlaşdırılması, geniş ictimaiyyətə çatdırılması və akademik irsin qorunması istiqamətində fəaliyyətini müasir dövrün tələblərinə uyğun şəkildə davam etdirəcək, elm və cəmiyyət arasında körpünün daha da möhkəmlənməsinə xidmət edəcək.
Bölmənin digər xəbərləri
