Milli musiqi irsimizi yaşadan “Ozan Saz” müsabiqəsi başa çatıb
Tbilisi, 22 iyul, AZƏRTAC
Gürcüstanda milli musiqi irsimizin yaşadılmasında və təbliğində mühüm rol oynayan və ilk dəfə təşkil olunan “Ozan saz” musiqi müsabiqəsi başa çatıb.
AZƏRTAC xəbər verir ki, iyulun 22-də Marneuli rayonunun Kəpənəkçi kəndində Ustad Aşıq Kamandarın “Ev Muzeyi”ndə müsabiqəyə yekun vurulub, qaliblər mükafatlandırılıblar.
Tədbirdə Azərbaycanın və Türkiyənin Gürcüstandakı səfirliklərinin əməkdaşları, Marneuli Bələdiyyəsinin sədri, Gürcüstanın Ombudsman Aparatının, Marneuli meriyasının əməkdaşları, saz- söz ustadları, ictimaiyyət nümayəndələri iştirak ediblər.
Müsabiqənin əsas təşkilatçısı, 24news.ge media qurumunun rəhbəri, tanınmış telejurnalist Azər Məmmədov tədbiri açaraq bildirib ki, festivalın əsas məqsədi Borçalı aşıq sənətini təbliğ və inkişaf etdirməkdir. May ayında başlayan müsabiqədə aşıq sənəti ilə birbaşa məşğul olan 15–20 yaşarası gənc istedadlar böyük səhnədə bacarıqlarını nümayiş etdiriblər.
Müsabiqənin münsiflər heyətinin üzvü professor Mahmud Kamaloğlu isə bildirib ki, bu müsabiqə milli musiqi irsinin yaşadılmasında və təbliğində mühüm rol oynayıb. Onun sözlərinə görə, müsabiqədə iştirak edən gənc aşıqların şeir söyləmək, saz alətində ifa, mahnı, təcnis, dodaqdəyməz, bayatı, dastan söyləmək kimi bacarıqları yoxlanılıb.
Azərbaycan səfirliyinin məsul əməkdaşı Cavid Məhərrəmov çıxışında bildirib ki, Türk dünyasını bir-birinə bağlayan ən böyük mənəvi dəyərlərdən biri saz və sözdür. Şərqdən Qərbə qədər bütün türk xalqlarını, türk dövlətlərini və türkdilli toplumları birləşdirən ortaq sərvət məhz saz, ozan sənəti və söz mədəniyyətidir.
Bu dəyərlərin qorunması, yaşadılması və gələcək nəsillərə ötürülməsi istiqamətində çalışan hər bir insan milli kimliyimizin və mənəvi irsimizin davamlılığında mühüm rol oynayır.
Marneuli bələdiyyəsinin sədri Amiran Georqadze bildirib ki, Gürcüstanda yaşayan azərbaycanlılar ölkə həyatının müxtəlif sahələrində olduğu kimi, mədəniyyət sahəsinin də inkişafında mühüm rol oynayırlar. Onlar aşıq sənətinin inkişafında, Gürcüstan hüdudlarından kənarda da təbliğ edərək ortaq mədəniyyətimizi yayırlar.
Türkiyə səfirliyinin əməkdaşı Yüksəl Kaya bildirib ki, incəsənətə başqa prizmadan baxdıqda görürük ki, insanların hisslərini, düşüncələrini, yaşadıqları duyğuları və coşqunu ifadə etmələrinin ən təsirli vasitələrindən biri məhz sənətdir. İnsanlar yaşadıqları ağrıları, sevincləri, kədərləri məhz sənət vasitəsilə ifadə edirlər. Sənət yalnız insana məxsus olan daxili hisslərin üzə çıxarılmasının ən gözəl formasıdır. Ozanların fəaliyyəti isə bu hisslərin xalq arasında ifadə olunmasının ən gözəl nümunəsidir.
Tarixçi-alim, Gürcüstan parlamentinin sabiq deputatı Ramiz Bəkirov, görkəmli alim Şürəddin Məmmədli və başqaları çıxış edərək bildiriblər ki, iki ozanın, iki şairin yazdığı misra və ya fotoqrafın çəkdiyi bir neçə şəkil bəzən yüzlərlə səhifəlik kitablardan daha böyük təsir gücünə malik olur və insanların qəlbində daha dərin iz buraxır. Məhz buna görə də belə tədbirlər çox önəmlidir.
Sonra ustad aşıq Həvəskar Qurbanov və onun yetirmələri maraqlı konsert proqramı ilə çıxış ediblər.
Sonda I, II və III yerlərin qaliblərinə qiymətli hədiyyələr, iştirakçılara isə sertifikatlar təqdim olunub.
Bölmənin digər xəbərləri
