MİLLİ QEYRİ-HÖKUMƏT TƏŞKİLATLARI FORUMUNUN V QURULTAYI KEÇİRİLMİŞDİR
AZƏRTAC xəbər verir ki, martın 2-də Avropa hotelində Azərbaycan Milli Qeyri-Hökumət Təşkilatları Forumunun (MQF) V qurultayı keçirilmişdir.
Dövlət himni səslənmiş, Azərbaycanın ərazi bütövlüyü və dövlət müstəqilliyi uğrunda canlarından keçmiş igid vətən övladlarının xatirəsi bir dəqiqəlik sükutla yad edilmişdir.
Qurultayın işçi heyəti seçilmişdir. MQF-nin prezidenti Azay Quliyevin hesabat dövründə forumun fəaliyyəti haqqında məruzəsi dinlənilmişdir.
Baş nazirin müavini, Dövlətqaçqınkomun sədri Əli Həsənov, Prezidentin İcra Aparatının ictimai siyasi şöbəsinin müdiri Əli Həsənov, iqtisadi inkişaf naziri Fərhad Əliyev, Milli Məclisin sosial siyasət daimi komissiyasının sədri Hadi Rəcəbli, ATƏT-in Bakı ofisinin rəhbəri Mauritsio Pavezi çıxış edərək, qeyri-hökumət təşkilatlarının vətəndaş cəmiyyəti quruculuğundakı yeri və rolu, ölkəmizdə dövlət qurumlarının və QHT-lərin qarşılıqlı əlaqəsi, 3-cü sektorun fəaliyyətini tənzimləyən əlverişli, sivil tələblərə cavab verən mövcud hüquqi bazası barədə danışaraq, respublika rəhbərliyinin qeyri-hökumət təşkilatlarının inkişafına, onların həyata keçirilən dövlət əhəmiyyətli layihələrin və sosial-iqtisadi proqramların icrasına daha fəal şəkildə cəlb olunmasına xüsusi əhəmiyyət verdiyini vurğulamış, təkcə ötən il 167 QHT-nin dövlət qeydiyyatına alındığını bildirmiş, forumun işinə uğurlar arzulamışlar.
Açıq diskussiya, tənqid və özünütənqid, aşkarlıq ruhunda keçən qurultayda QHT-lərin fəaliyyətinin əlaqələndirilməsi, bütövlükdə, 3-cü sektorun cəmiyyətdə öz layiqli yerini tutması, regionlarda icma əsaslı təşkilatların inkişaf etdirilməsi, dövlət, donor və beynəlxalq təşkilatlarla əlaqələrin hazırkı vəziyyəti, transmilli proqramların icrası ilə bağlı görülmüş işlər, qarşıda duran vəzifələr geniş təhlil olunmuş, mövcud problemlərin aradan qaldırılması yolları barədə ətraflı fikir mübadiləsi aparılmış, təkliflər irəli sürülmüşdür.
Aparılmış rəy sorğusunun nəticələrinə əsasən, ictimai sektorun inkişafında xidmətlərinə görə 3 təşkilata “İlin QHT-si” mükafatı, fəxri diplomlar təqdim edilmişdir.
Forum iştirakçıları adından tədbirə sponsorluq edən “Qaradağ-Sement” ASC-nin rəhbərliyinə təşəkkür bildirilmişdir.
Qurultayda qətnamə qəbul olunmuşdur.
