Minaya düşən “Azərişıq” əməkdaşının vəziyyəti stabildir
Bakı, 23 noyabr, AZƏRTAC
Noyabrın 21-də Laçın rayonunun Güləbird kəndi ərazisində minaya düşərək xəsarət alan “Azərişıq” ASC əməkdaşı Əbilov Mahir Ramiz oğlunun vəziyyəti hazırda stabildir.
ASC-dən AZƏRTAC-a bildirilib ki, hadisədən dərhal sonra Mahir Əbilov “Azərişıq” rəhbərliyinin qərarı ilə təcili olaraq Bakı şəhərindəki özəl klinikalardan birinə gətirilib və əməliyyat olunub. Təəssüf ki, yaralının bir ayağı topuqdan amputasiya edilib.
Qeyd edək ki, Biləsuvar rayon sakini, 1988-ci il təvəllüdlü Əbilov Mahir Ramiz oğlu xidməti vəzifəsini yerinə yetirən zaman minaya düşüb. O, Laçın istiqamətində yüksək gərginlikli xəttin çəkilişi üçün buraya Biləsuvar Elektrik Şəbəkəsindən elektrik kimi ezam olunub.
Erməni terroru dinc insanlara qarşı öz çirkin üzünü hər zaman göstərir. Bununla belə cəsur “Azərişıq” əməkdaşları müharibənin ilk günündən etibarən heç nədən qorxmayaraq hərbçilərimizlə çiyin-çiyinə öndə olublar və müharibədən sonra da quruculuq işlərində də böyük şərəf hissi ilə öz fəaliyyətlərini davam etdirirlər.
Bölmənin digər xəbərləri
