REGİONLAR
Mingəçevir Dövlət Universitetində “Qarabağ Azərbaycandır!” mövzusunda tələbə elmi konfransı keçirilib
Bakı, 13 dekabr, AZƏRTAC
Mingəçevir Dövlət Universitetinin (MDU) İqtisadiyyat və idarəetmə fakültəsində Tələbə Elmi Cəmiyyətinin (TEC) “Qarabağ Azərbaycandır!” mövzusunda elmi konfransı keçirilib.
MDU-dan AZƏRTAC-a bildirilib ki, “Microsoft Teams” platforması üzərindən onlayn formatda keçirilən konfransı açan fakültənin dekanı, dosent Nüşabə Qədimli, ilk növbədə, konfrans iştirakçılarına Müzəffər Ali Baş Komandanımızın rəhbərliyi və yenilməz Azərbaycan Ordusunun rəşadəti sayəsində 44 günlük Vətən müharibəsində əldə olunan şanlı Qələbə münasibətilə MDU-nun rektoru Şahin Bayramovun təbrikini çatdırıb.
Təqdim olunacaq mövzular barədə ətraflı məlumat verildikdən sonra tələbələrin məruzələri dinlənilib.
Konfransda universitetin İqtisadiyyat və idarəetmə fakültəsinin tələbələrindən İlkin Hüseynli “Qarabağ müharibəsinin siyasi tarixi” mövzusunda (Elmi rəhbər: b.m.Mətanət Yusifova), Xanımtər Vəliyeva “Qarabağın dağıdılmış və məhv edilmiş tarixi abidələri” mövzusunda (Elmi rəhbər: b.m.Elmira Hacıyeva), Fidan Rəhimli “Qarabağın mədəniyyəti” mövzusunda (Elmi rəhbər: dos.Nüşabə Qədimli), Gülşən Cahangirova “Qarabağın təbii resursları” mövzusunda (Elmi rəhbər: b.m.Təranə Səfərova), Sevinc Allahverdiyeva “Qarabağın inciləri və ekoloji terror” mövzusunda (Elmi rəhbər: i.f.d Ruhiyyə Hüseynova), Çingiz Çingizzadə “Qarabağın iqtisadi potensialı” mövzusunda (Elmi rəhbər: b.m. Günəş Şəfaqətov), Anar Quliyev “Qarabağın sənaye potensialı və onun perspektiv inkişaf imkanları” mövzusunda (Elmi rəhbər: b.m.Arif Tağıyev) və Əlirza Abdullayev “Cənnət Qarabağın turizm imkanları” mövzusunda (Elmi rəhbər: b.m. Təranə Əliyeva) məruzələr ilə çıxış ediblər.
Müəllim və tələbə heyəti tərəfindən maraqla qarşılanan məruzələr ətrafında geniş müzakirələr aparılıb.
Elmi konfransda Vətən müharibəsində əldə olunan şanlı Qələbəyə və işğaldan azad edilmiş bölgələrimizin gələcək inkişafı ilə bağlı tədqiqatlara tələbələrin böyük maraq göstərməsi yüksək qiymətləndirilib, bu istiqamətdə tələbələrin fəallığının daha da artırılması üçün MDU tərəfindən bütün zəruri imkanların yaradılacağı qeyd olunub.