MİNGƏÇEVİRDƏKİ “KÜR” OLİMPİYA TƏDRİS-İDMAN MƏRKƏZİ YENİDƏN QURULUR
AZƏRTAC xəbər verir ki, Mingəçevirdə 1992-ci ildən fəaliyyəti dayanan və yararsız hala düşmüş “Kür” Olimpiya Tədris-İdman Mərkəzinin yenidən qurulması işləri sürətlə davam edir. Avarçəkmə bazasının köhnə korpusları tam söküldükdən sonra 6 hektarlıq ərazidə müasir standartlara uyğun, avarçəkmə bazası inşa edilir.
Mərkəzin inzibati binasının ikinci mərtəbəsində daş-hörgü işləri başa çatdırılmışdır. Eyni vaxtda burada 8 mərtəbəli otel, idman zalı və 25X50 metr ölçüdə üzgüçülük hovuzu tikilir. İdman bazasında soyunub-geyinmə otaqları, duşxanalar, qayıqlar üçün anqarlar, 4 ədəd böyük tennis kortu və idmançıların istirahət guşəsi də yaradılacaqdır.
Mərkəz respublika və beynəlxalq miqyaslı su-avarçəkmə yarışlarının, yerli və xarici idmançıların təlim-məşqlərinin keçirilməsi üçün hər cür şəraitlə təmin olunacaqdır.
Kompleksdə aparılan yenidənqurma işləri Prezident İlham Əliyevin tam nəzarətindədir. Hazırda burada 100-dən artıq inşaatçı və quraşdırıcı çalışır. Yaxın vaxtda onların sayı 300-ə çatdırılacaqdır.
Tikinti-quraşdırma işlərini Bosniyanın “Serbaz” tikinti şirkəti aparır. Bu şirkət MDB məkanında, xüsusilə də Bakı və Moskva şəhərlərində bir sıra idman obyektlərinin tikintisini və ya əsaslı təmirini həyata keçirmişdir.
Kompleksin 2009-cu ilin sonlarında istifadəyə verilməsi nəzərdə tutumuşdur.
Bölmənin digər xəbərləri
