Misir polisi təhlükəli yeddi cinayətkarı məhv edib
Qahirə, 2 sentyabr, AZƏRTAC
Misir polisinin Asuan vilayətində keçirdiyi iki əməliyyat nəticəsində narkotik maddələrin qanunsuz dövriyyəsi, silah satışı, quldurluq və qətl törətməkdə şübhəli bilinən 7 nəfər qatı cinayətkar məhv edilib.
AZƏRTAC xəbər verir ki, bu barədə ölkənin Daxili İşlər Nazirliyi məlumat yayıb.
Nazirliyin məlumatında bildirilib ki, ağır cinayətlərdə şübhəli bilinən, həmçinin axtarışda olan bir neçə şəxs də həbs edilib. Reydlər zamanı baş verən silahlı atışmada bir neçə cinayətkarın da yaralandığı bildirilir. Onların gizləndikləri mənzillərdən avtomat silahlar və partlayıcı maddələr aşkar edilərək götürülüb. Əməliyyatlar zamanı bir polis zabiti xəsarət alıb.
Asuan vilayəti Misirdə narkotik və silah alverçilərinin daha çox olduğu bölgə sayılır. Polis vaxtaşırı olaraq bu ərazidə reydlər və əməliyyatlar keçirir.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
