Misirdə COVID-19-dan vəfat edənlərin sayı artır
Qahirə, 2 sentyabr, AZƏRTAC
Misirdə COVID-19-dan vəfat edənlərin sayı yenidən artır. AZƏRTAC Misir Səhiyyə Nazirliyinə istinadla xəbər verir ki, son sutka ərzində bu ölkədə 19 pasiyent dünyasını dəyişib, 179 nəfər isə yeni növ koronavirusa yoluxub. Ümumi yoluxma halları 99 mindən çoxdur, vəfat edənlərin sayı isə 5440 nəfərə çatıb.
Misir hökuməti yoluxma və ölüm hallarının artması səbəbindən pandemiyanın ikinci dalğasına hazırlıq işləri görür. Prezident Əbdülfəttah əl Sisi yeni tədris ilində məktəb və universitetlərdə həyata keçiriləcək tədbirləri müzakirə etmək üçün ölkənin Təhsil nazirini qəbul edib. Prezidentin mətbuat xidmətinin məlumatında bildirilir ki, nazir COVID-19-a yoluxma hallarını azaltmaq məqsədilə tədris müəssisələrinin bir çoxunda dərsləri iki gün keçirməyi, əlavə olaraq distant təhsilə üstünlük verməyi təklif edib. O, şagirdlərin məktəblərdə yaradılan elektron təhsil sisteminə qoşulması üçün görülən işlər barədə məlumat verib. Bundan başqa, 23 milyon şagirdin təhsil aldığı məktəblərdə sosial məsafə, yaxşı havalandırma sistemi, mütəmadi dezinfeksiya məsələləri də diqqət mərkəzində olacaq. Bu tədbirlər növbəti tədris ilinin sonuna - 2021-ci il iyunun 24-dək davam etdiriləcək. Şagirdlərin hamısının qoruyucu maskalardan istifadə etməsi məcburi olacaq və məktəb binasının girişində onların bədən temperaturu ölçüləcək.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
