Misirdə Senata seçkilərdə COVID-19 pandemiyası səbəbindən məntəqələrin sayı artırılıb
Qahirə, 18 iyul, AZƏRTAC
Avqustun 9-da Misir parlamentinin yuxarı palatasına - Senata ilk dəfə keçiriləcək seçkilər ərəfəsində bu ölkənin Milli Seçki Komissiyası mətbuat konfransı keçirib.
AZƏRTAC xəbər verir ki, komissiyanın üzvü Xalid Əraq COVID-19 pandemiyası ilə əlaqədar seçicilərin sıxlığının qarşısını almaq məqsədilə seçki məntəqələrinin sayının 17 minə çatdırıldığını bəyan edib. O bildirib ki, Senata seçkilər üzrə siyahıda 63 milyon seçici qeydə alınıb. Bundan başqa, bütün siyasi partiyalara seçki prosesində üzvlərinin qoruyucu maskalardan istifadə etməsi və səsvermə zamanı sosial məsafəyə əməl olunması barədə müraciət ünvanlanıb.
Milli Seçki Komissiyasının sədri Laşin İbrahim bildirib ki, indiyədək 113 senator yerinə 682 nəfərin namizədliyi qeydə alınıb. Bu gün namizədlərin qeydiyyata alınması başa çatır, iyulun 19-da isə onların adları açıqlanacaq. O əlavə edib ki, seçki kampaniyası və səsvermə zamanı baş verə biləcək qanun pozuntularını araşdırmaq üçün xüsusi komissiya da yaradılıb.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
