Misirdə vaksin olunmayan şəxslər dövlət idarələrinə buraxılmayacaq
Qahirə, 18 oktyabr, AZƏRTAC
Misirdə noyabrın 15-dən etibarən COVID-19 əleyhinə vaksin olunmamış şəxslər dövlət idarələrinə buraxılmayacaq. AZƏRTAC xəbər verir ki, bu qərar Nazirlər Kabinetinin iclasında qəbul olunub.
Qərarda qeyd olunub ki, dövlət idarələrində çalışanlardan vaksinasiya sertifikatı, yaxud həftədə bir dəfə PCR testinin nəticələri tələb olunacaq. Dekabrın 1-dən isə vaksinasiya sertifikatı olmayan bütün vətəndaşlara dövlət idarələrinə giriş qadağan edilir.
İclasda çıxış edən Misirin səhiyyə naziri Halə Zayid bildirib ki, hazırda ölkədə 63 milyon dozadan ibarət vaksin ehtiyatı mövcuddur. Onun sözlərinə görə, yaxın günlərdə daha 7,8 milyon doza vaksin gətiriləcək. Bundan başqa, gələn həftədən etibarən Misirin VACSERA farmasevtik qurumu Çinin “Sinovac” şirkətinin “Coronavac” vaksininin istehsalına başlayacaq.
Misir hökuməti, həmçinin COVID-19 pandemiyasının əsas mənbəyi olan məscidlərdəki abdəstalma yerlərinin açılmasına dair müraciətləri qəbul etməyib. Qeyd edək ki, son günlərdə bu ölkədə COVID-19-dan ölüm halları artıb. Oktyabrın 17-də 44 pasiyent dünyasını dəyişib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
