Misirlə Yunanıstan arasında yaşıl enerji nəqli ilə bağlı müqavilə imzalanıb
Qahirə, 1 may, AZƏRTAC
Avropa Yenidənqurma və İnkişaf Bankı (AYİB) ilə “Misir-Yunanıstan elektrik enerjisi bağlantısı” (GREGY) layihəsi üzrə yaradılmış “Copelouzos Group” konsorsiumu arasında qrant müqaviləsi imzalanıb.
AZƏRTAC yerli mediaya istinadla xəbər verir ki, AYİB layihənin texniki-iqtisadi əsaslandırılmasını maliyyələşdirəcək.
GREGY layihəsi cənubdan şimala doğru uzanan yaşıl enerji dəhlizinin yaradılmasını nəzərdə tutur. Bu dəhliz Misirin bərpa olunan mənbələrdən əldə edilən təmiz və rəqabətədavamlı enerjini fasiləsiz axınla Yunanıstana və oradan Avropaya ötürəcək. Dənizin dibi ilə çəkiləcək kabellə Misirdən Yunanıstana 3 min meqavat yaşıl enerji ötürüləcək.
GREGY layihəsi ilə ildə təxminən 4,5 milyard kubmetr təbii qaza qənaət ediləcək və karbon qazı emissiyalarını 9–10 milyon ton azaldacaq. Layihə çərçivəsində tədricən 6 giqavat gücündə külək enerjisi stansiyaları və 3,5 giqavat gücündə Günəş enerjisi stansiyalarının yaradılması planlaşdırılır.
Avropa Yenidənqurma və İnkişaf Bankının Avropa üzrə enerji şöbəsinin rəhbəri Jerzey Zelinski bu layihəni dəstəkləməkdən məmnunluğunu ifadə edib. Bildirib ki, layihə bankın bazar inteqrasiyası, yaşıl enerjiyə keçid və enerji təhlükəsizliyi kimi prioritetlərinə tam uyğun gəlir.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
