MOLDOVA HÖKUMƏTİ ABXAZİYANIN VƏ CƏNUBİ OSETİYANIN MÜSTƏQİLLİYİNİN TANINMASININ ƏLEYHİNƏDİR
AZƏRTAC-ın xüsusi müxbiri xəbər verir ki, Moldova hökuməti hesab edir ki, Abxaziyanın və Cənubi Osetiyanın müstəqilliyinin beynəlxaq aləmdə tanınması sabitlik amili ola bilməz. Eyni zamanda, müvafiq regionda yaranmış vəziyyətlə Dnestryanı bölgədəki vəziyyət arasında hər hansı əlaqə yoxdur. Bu rəsmi mövqe Moldova hökumətinin Baş naziri Zinaida Qreçanaya tərəfindən imzalanmış bəyanatda əksini tapmışdır.
Moldova hökuməti münaqişəli məsələlərin, o cümlədən ərazi bütövlüyünün təmin olunması ilə əlaqədar problemlərin güc yolu ilə həlli metodlarını qəti surətdə rədd edir, Abxaziyanın və Cənubi Osetiyanın beynəlxalq aləmdə tanınmasının vəziyyəti sabitləşdirən amil olacağını hesab etmir.
Sənəddə vurğulanır ki, Moldova hökuməti hadisələrin bu cür inkişafının Dnestryanı münaqişənin həlli prosesinə ziyan gətirəcəyi barədə fikirləri qeyri-konstruktiv hesab edir. Dnestryanı münaqişənin həlli üçün əlverişli şərait yaranmışdır və nizamasalma prosesində iştirak edən bütün tərəflər siyasi iradə nümayiş etdirirlər.
Moldova hökuməti bəyan edir ki, bundan sonra da Cənubi Osetiya və Abxaziya ətrafında hadisələrin inkişafı ilə bağlı mövqeyini Helsinki Yekun Aktının müddəaları, BMT Nizamnaməsi və beynəlxalq hüququn prinsipləri əsasında müəyyən edəcəkdir.
Bölmənin digər xəbərləri
